جولدى تۇگەل اشۋعا ءالى مۇمكىندىك جوق
الماتى-بىشكەك تاس جولىنداعى ەستاكادا قۇرىلىسىنىڭ ساعىزشا سوزىلۋى كەپتەلىس تۋدىرىپ تۇر. وسىلاي شاعىم ايتقان كولىك جۇرگىزۋشىلەرى 4 جولاقتى جولدىڭ قۇرىلىس كەسىرىنەن تارىلىپ قالعانىن ايتادى. تار جەرمەن سىعىلىپ وتەتىن كولىكتەر سالدارىنان ءجيى سوقتىعىسىپ قالادى، دەپ حابارلايدى Almaty-akshamy.kz Almaty.tv-گە سىلتەمە جاساپ.
ساعاتتاپ كەپتەلىستە تۇرىپ، سابىرى سارقىلعان جۇرگىزۋشىلەر ماسەلە كوپىر قۇرىلىسىندا دەپ شاعىمدانۋدا. ولار جول ورتاسىنا دەيىن قويىلعان باعانالاردىڭ تۇرعانىنا دا ۇزاق ۋاقىت بولعانىن ايتتى.
«كوپىر قۇرىلىسى بىتكەن جوق. باياعىدا بىتەتىن جۇمىس ۇزاققا سوزىلىپ كەتتى. كەپتەلىس سالدارىنان جول-كولىك وقيعاسى ءجيى بولادى. ەرتە شىققاننىڭ وزىندە جۇمىسقا كەشىگىپ بارامىز»، – دەدى وبلىس تۇرعىنى ولجاس دايىرمان.
- «اسىل ارمان» تۇرعىن ءۇي كەشەنىندە تۇرامىن. كۇندە وسىندا كەلىپ، ىستەگەن جۇمىستارىنا قاراپ تۇرامىن. ارماتۋرا توقۋدىڭ ەشقانداي قيىندىعى جوق، وعان تەحنولوگيا كەرەك ەمەس. جۇمىستى تىم ۇزاققا سوقىپ جىبەردى»، – دەدى قالا تۇرعىنى ايات مالعاجىن.
ءتۇسىرىلىم كەزىندە دە "التىن وردا" بازارى ماڭىنداعى بۇل تاس جولدا كولىكتەردىڭ سوقتىعىسىپ قالعانىن بايقادىق. كولىك جۇرگىزۋشىلەرىنىڭ ايتۋىنشا، ەستاكادانى اينالىپ وتەتىن باسقا جول جوق.
"الماتى-بىشكەك تاس جولىنداعى «اسىل ارمان» تۇرعىن ءۇي كەشەنى مەن «التىن وردا» بازارى اراسىنداعى كولىك قوزعالىسىن رەتتەۋ وڭاي ەمەس"، - دەيدى جول پاترۋلدىك پوليسياسىنىڭ قىزمەتكەرلەرى. ولاردىڭ ايتۋىنشا، ەرەجەنى ساقتامايتىن جۇرگىزۋشىلەردىڭ كەسىرىنەن كولىكتەر دە ءجيى سوقتىعىسىپ قالادى ەكەن.
«بۇل جەردە پوليسيانىڭ كومەگى ەشقانداي ءرول وينامايدى. مىنا جەردە جوندەۋ جۇمىستارى ءجۇرىپ جاتىر. كوپىر سالىنىپ جاتىر، ار جاقتان كولىك ءتورت جولاقپەن كەلەدى دە قىسىلادى. سەبەبى بەرى جاعىندا تەك ەكى جولاقپەن جۇرە الادى. كەپتەلىس، كۇنىنە 10-نان ارتىق جول-كولىك وقيعاسى تىركەلەدى»، – دەدى پوليسيا دەپارتامەنتى پاترۋلدىك پوليسيا باتالونى قىزمەتىنىڭ اعا ينسپەكتورى ارنۇر تۇرداقىنوۆ.
ال اتالعان 160 مەترلىك ەستاكادا قۇرىلىسىنا 77 ادام جۇمىلدىرىلدى دەگەن جاۋاپتى كومپانيا ەكى اۋىسىممەن جۇمىس ىستەپ جاتقاندارىن ايتادى. الايدا اۋا رايىنا بايلانىستى قيىندىق تۋىنداعانىن جاسىرمادى.
«ءيا، كەپتەلىس بولادى. بەتون جاساعاندا، تەك ەكى جولاقتى قالدىرعانبىز. ءقازىر جۇمىس ءبىتتى عوي، ەندى الىپ تاستاعاننان سوڭ كەپتەلىس بولمايدى.2023 جىلى قىركۇيەك ايىندا جۇمىس اياقتايمىز»، – دەدى «قازاۆتوجول»ۇك» اق فيليالى ديرەكتورىنىڭ ورىنباسارى نۇرجان تاڭاتاروۆ.
جولدى تۇگەل اشۋعا ءالى مۇمكىندىك جوق. بۇگىننەن باستاپ تەمىر تىرەۋىشتەر شەتىنەن الىنىپ تاستالىپ جاتىر. ەندى قۇرىلىس تولىق اياقتالعانشا، تەمىر تۇلپار تىزگىندەگەندەر تەك ەكى جولاقپەن وتۋگە ءماجبۇر.