تۇركىستان وبلىسىندا ءتارتىپ ساقشىسى تاسقىن سۋعا باتىپ بارا جاتقان تۇرعىندى قۇتقارىپ قالدى، دەپ حابارلايدى Almaty-akshamy.kz.
وقيعا 2 اقپان كۇنى بولعان. ساۋران اۋدانىن سۋ العان ساتتە، شاعا اۋىلىندا كەزەكشىلىكتە جۇرگەن ۋچاسكەلىك پوليسيا ينسپەكتورى اباي بايجۇمان بەلگىسىز ەر ادامنىڭ تاسقىن سۋعا قۇلاپ كەتكەنىن كورگەن.
بىردەن كولىكتى توقتاتقان ول كيىممەن سۋعا كىرىپ، اعىن سۋدىڭ ورتاسىندا بولعان ەر ازاماتتى ءقاۋىپسىز جەرگە الىپ شىققان. كەيىن قۇتقارىلعان ادامدى "جەدەل جاردەم" قىزمەتكەرلەرى اۋرۋحاناعا الىپ كەتكەن.
«قيىن ساتتە تۇركىستان وبلىسىنىڭ پوليسەيلەرى جۇدىرىقتاي جۇمىلىپ، ازاماتتاردى ەۆاكۋاسيالاۋعا جانە ولاردىڭ مۇلكىن قورعاۋعا اتسالىسىپ جاتىر. ماسەلەن، نەبارى 2 كۇن ىشىندە تۇركىستان وبلىسىنىڭ پوليسەيلەرى ارنايى ماماندارمەن بىرگە 200-دەن استام ادامدى ەۆاكۋاسيالاپ، ءقاۋىپسىز جەرگە الىپ شىقتى»، - دەلىنگەن تۇركىستان وبلىسى پوليسيا دەپارتامەنتىنىڭ باسپا ءسوز قىزمەتى تاراتقان اقپاراتتا.