الماتىدا كونستيتۋسيا كۇنى قارساڭىندا كۇردەلى جوندەۋدەن كەيىن بىردەن ءۇش مەديسينالىق ۇيىم سالتاناتتى اشىلدى، سونداي - اق قازاقستانداعى العاشقى سيفرلىق مەديسينا ورتالىعى - Almaty Digital Medical Center (ADMC) ىسكە قوسىلدى.
ءىس-شاراعا الماتى قالاسى قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى م.ا. ءلايلا يمانعالييەۆا قاتىستى.
سيفرلىق مەديسينا ورتالىعىن دەنساۋلىق ساقتاۋ باسقارماسى مەن قالانىڭ سيفرلاندىرۋ باسقارماسى بىرلەسىپ قۇردى. مۇندا زاماناۋي قىزمەتتەر جيناقتالعان: اقپاراتتىق - تالداۋ ورتالىعى، 1312 ءبىرىڭعاي بايلانىس ورتالىعى، تەلەمەديسينالىق پاتروناج، تەلەمەديسينا قىزمەتتەرى جانە جاساندى ينتەللەكتپەن داۋىستىق كومەكشىلەر. بۇل دەنساۋلىق ساقتاۋ جۇيەسىن اشىق جانە ىڭعايلى ەتەدى، كۇتۋ ۋاقىتىن قىسقارتادى جانە پاسيەنتتەردىڭ دارىگەرلەرمەن بايلانىسىن جاقسارتادى.
№3 قالالىق ەمحانا كۇردەلى جوندەۋدەن كەيىن تولىق جاڭارتىلدى. ينجەنەرلىك جەلىلەر اۋىستىرىلدى، كابينەتتەر، زالدار مەن كۇتۋ ايماقتارى جوندەلدى، الاڭ اباتتاندىرىلدى. ەمحانادا 500 قىزمەتكەر جۇمىس ىستەيدى، ونىڭ ىشىندە 104 دارىگەر، ولارلىڭ 40 قاجەتتى ماماندار.
مۇندا سيمۋلياسيالىق ورتالىق اشىلدى، وندا دارىگەرلەر مەن مەدبيكەلەر شۇعىل كومەك كورسەتۋ جانە رەانيماسيا داعدىلارىن تەگىن پىسىقتايدى. ورتالىق زاماناۋي ترەناجەرلارمەن جانە مانەكەندەرمەن جابدىقتالعان، ال قىزمەتكەرلەر مالايزيادا بىلىمدەرىن جەتىلدىردى.
2022 جىلدان باستاپ ەمحانادا وقۋشىلار اراسىندا ءسۋيسيدتىڭ الدىن الۋ بويىنشا پسيحولوگيالىق ورتالىق جۇمىس ىستەيدى. بۇل ەلدەگى جالعىز ورتالىق. ول يۋنيسەف-پەن بىرگە قۇرىلعان جانە بالالار مەن جاسوسپىرىمدەرگە پسيحيكالىق دەنساۋلىقتى ساقتاۋ مادەنيەتىن قالىپتاستىرۋعا كومەكتەسەدى.
سونىمەن قاتار، "Damumed"جۇيەسىمەن بايلانىستى داۋىستىق روبوت نەگىزىندە ۆيرتۋالدى اسسيستەنت ەنگىزىلدى. زاماناۋي زەرتحانا دا جۇمىس ىستەيدى.
№18 ەمحانانىڭ "تاۋگۇل" فيليالى 19 جىلدا العاش رەت جاڭعىرتۋدان ءوتتى. عيمارات وقشاۋلانىپ، قاسبەتى، تەرەزەلەرى مەن ەسىكتەرى جاڭارتىلىپ، جاڭا جەلدەتۋ مەن قازاندىق ورناتىلدى. اۋماق اباتتاندىرىلدى. فيليالدا زاماناۋي جابدىقتارى بار زەرتحانا جانە ەكى ۋلترادىبىستىق اپپارات پايدا بولدى.
№8 جەدەل جاردەم قوسالقى ستانساسى الاتاۋ، اۋەزوۆ جانە ناۋرىزباي اۋداندارىنىڭ 200 مىڭعا جۋىق تۇرعىنىنا قىزمەت كورسەتەدى. مۇندا 17 بريگادا جانە 200-دەن استام قىزمەتكەر جۇمىس ىستەيدى. جوندەۋدەن كەيىن عيمارات وقشاۋلانىپ، تەرەزەلەر مەن ەسىكتەر اۋىستىرىلدى، جىلۋ مەن جەلدەتۋ جاڭارتىلدى، ءورت دابىلى كۇشەيتىلدى. اۆتوبوكستار زاماناۋي قاقپالارمەن، جەلدەتۋمەن جانە ەنەرگيانى ۇنەمدەيتىن جارىقتاندىرۋمەن جابدىقتالعان.
سيفرلىق مەديسينا ورتالىعىنىڭ جانە جاڭارتىلعان مەديسينالىق ۇيىمداردىڭ اشىلۋى الماتىنىڭ دەنساۋلىق ساقتاۋ سالاسىن دامىتۋ ءۇشىن ماڭىزدى قادام بولدى. بۇل جوبالار مەديسينالىق كومەكتىڭ ساپاسىن جاقسارتادى، ونى قولجەتىمدى ەتەدى جانە جاڭا تەحنولوگيالاردى ەنگىزۋگە مۇمكىندىكتەر اشادى.