الماتىدا العاش رەت ەرتە ارالاسۋ ورتالىعى قۇرىلىپ، وتباسىلاردى، مۇگەدەكتىگى بار ادامدار مەن الەۋمەتتىك وسال توپتاردى قولداۋعا باعىتتالعان جاڭا الەۋمەتتىك باستامالار ىسكە قوسىلدى. وڭىرلىك كوممۋنيكاسيالار قىزمەتىندە وتكەن باسپا ءسوز ءماسليحاتىندا جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى باۋىرجان جاۋباسوۆ وسىلاي دەدى.
اتالعان ورتالىق قازىرگى تاڭدا ەكى مىڭعا جۋىق قىزمەت ءتۇرىن كورسەتىپ، حالىقارالىق ستاندارتتارعا ساي جەكە كومەك باعدارلامالارىن ەنگىزىپ وتىر.
باسقارما جانىندا وتباسىنى قولداۋ ورتالىعى دا جۇمىس ىستەي باستادى. بۇل ورتالىق قيىن جاعدايعا تاپ بولعانداردى ەرتە انىقتاپ، جەكە دامۋ جوسپارى اياسىندا ولارعا قولداۋ كورسەتەدى. ءقازىر 418 ادام وسىنداي كومەك العان.
مۇگەدەكتىگى بار بالالارعا ارناپ الەۋمەتتىك ينتەگراسيا ورتالىعى دا اشىلدى. مۇندا ارت-تەراپيانى، مۋزىكانى، تەاتر مەن بي تەراپياسىن، سونداي-اق فوتو مەن ۆيدەوعا ءتۇسىرۋدى وقىتاتىن ارناۋلى باعدارلامالار بار. جوبا جىلىنا 240 ادامدى قامتىپ وتىرادى.
قالادا سۋبسيديالاناتىن جۇمىس ورىندارىنىڭ باعدارلاماسى دا جۇزەگە اسىرىلىپ جاتىر. ستاتيستيكاعا سايكەس، الماتىدا 59 329 مۇگەدەكتىگى بار ادام تۇرسا، ولاردىڭ 28 876-سى ەڭبەككە جارامدى. ءقازىر رەسمي تۇردە 9 638 ادام جۇمىس ىستەيدى (33،4%).
مەديسينا، الەۋمەتتىك قولداۋ مەن جۇمىسقا تۇرۋ سياقتى باعىتتاردى قامتيتىن كەشەندى شارالار قالانىڭ الەۋمەتتىك تۇراقتىلىعىن نىعايتىپ، بارلىق تۇرعىندارعا تەڭ مۇمكىندىك جاساۋدى كوزدەيدى.
جالپى العاندا، جىل سايىن مۇگەدەكتىگى بار ادامدارعا ارنالعان الەۋمەتتىك جوبالاردى ىسكە اسىرۋعا 3،1 ملرد تەڭگە كولەمىندە قارجى بولىنەدى.