الماتىدا الەۋمەتتىك وسال توپتاردى قولداۋ بويىنشا اۋقىمدى جۇمىس ىستەلىپ جاتىر. از قامتىلعان وتباسىلارعا، مۇگەدەكتىگى بار ادامدار مەن الەۋمەتكە قايتا بەيىمدەۋدى قاجەت ەتەتىن ازاماتتارعا كوپ كوڭىل ءبولىنىپ وتىر. وڭىرلىك كوممۋنيكاسيالار قىزمەتىندە وتكەن باسپا ءسوز ءماسليحاتىندا جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى باۋىرجان جاۋباسوۆ وسىلاي دەپ مالىمدەدى.
جىل باسىنان بەرى الماتى قالاسىندا 196 293 ادام جالپى سوماسى 4،5 ملرد تەڭگەگە الەۋمەتتىك كومەك الدى. اتاۋلى الەۋمەتتىك كومەكپەن 1 621 وتباسى (8 126 ادام) قامتىلدى.
مۇگەدەكتىگى بار ادامداردى قولداۋعا ەرەكشە كوڭىل بولىنگەن. الماتىدا مۇگەدەكتىگى بار 59،3 مىڭ ادام تۇرادى. 2025 جىلعا وسى ساناتتاعى ازاماتتاردى قولداۋعا 17،4 ملرد تەڭگە قاراستىرىلعان. بۇل 2022 جىلمەن سالىستىرعاندا ەكى ەسەگە جۋىق (7،9 ملرد تەڭگە) كوپ.
جىل باسىنان بەرى تەحنيكالىق وڭالتۋ قۇرالدارى مەن قىزمەتتەرىن الۋ ءۇشىن 40 499 ادام جۇگىنگەن، ونىڭ 27 048ء-ى (66،8%) قاجەتتى كومەكتى الدى. جىل سوڭىنا دەيىن بۇل كورسەتكىشتى 95%-عا جەتكىزۋ جوسپارلانىپ وتىر.
قامتاماسىز ەتۋ الەۋمەتتىك قىزمەتتەر پورتالى ارقىلى جۇزەگە اسادى. قاجەتتى قۇرال بولماعان جاعدايدا ازامات ونى ساتىپ تا الا الادى. سونىمەن قاتار، قىمبات يننوۆاسيالىق وڭالتۋ قۇرالدارىمەن قامتاماسىز ەتۋ جۇمىسى دا جۇرگىزىلۋدە. بۇل ماقساتقا 1،4 ملرد تەڭگە ءبولىندى. 277 ادامدى قامتاماسىز ەتۋ جوسپارلانىپ، بۇگىنگى كۇنگە دەيىن 43 ادام پروتەز، اربا، ەستۋ اپپاراتتارى، سويلەۋ پروسەسسورلارى جانە باسقا دا كەرەكتى قۇرالدارىن العان.
«ينۆاتاكسي» قىزمەتى دە دامىپ جاتىر: 2025 جىلى اۆتوپارك 100-دەن 145 كولىككە دەيىن ۇلعايتىلدى. بۇل ماقساتقا 1،4 ملرد تەڭگە ءبولىندى. سونىمەن قاتار، «ياندەكس تاكسي» اگرەگاتورىمەن بىرلەسكەن پيلوتتىق جوبا ىسكە اسا باستادى. سونىڭ ارقاسىندا بۇل قىزمەتتى پايدالاناتىندار سانى 2 800 ادامعا ارتقان.
قالا كەڭىستىگىن مۇمكىندىگى شەكتەۋلى جاندارعا بەيىمدەۋ بويىنشا اۋقىمدى جۇمىس جۇرگىزىلىپ جاتىر. 2025 جىلى 32،5 مىڭ نىسان (تۇرعىن ۇيلەر، كوشەلەر، ساياباقتار مەن عيماراتتار) قۇجاتتاۋدان وتەدى. 2021 جىلدان 2024 جىلعا دەيىن 4 257 نىسان بەيىمدەلدى، بيىل تاعى 1 277 نىسان ستاندارتقا سايكەستەندىرىلەدى.
بۇگىندە 3 504 مۇگەدەكتىگى بار ادام ارنايى الەۋمەتتىك قىزمەتتەرمەن قامتىلعان. كومەك كورسەتەتىن بارلىق 9 مەديسينالىق-الەۋمەتتىك مەكەمە مەن 13 ۇكىمەتتىك ەمەس ۇيىم ليسەنزيادان ءوتىپ، سيفرلاندىرىلعان. سونىمەن قاتار، ۇەۇ مۇگەدەكتىگى بار بالالار مەن ءارتۇرلى دەرتكە شالدىققان ەرەسەكتەرگە مەملەكەتتىك تاپسىرىس اياسىندا قىزمەت كورسەتەدى.
الماتى الەۋمەتتىك كومەكتى ناقتى ءارى ءتيىمدى جەتكىزۋدى جالعاستىرىپ، كومەككە مۇقتاج جاندارعا قولداۋدى نىعايتۋدى باستى نازاردا ۇستاپ وتىر.