الماتى قالاسى ادىلەت دەپارتامەنتىنىڭ زياتكەرلىك مەنشىك قۇقىقتارى ءبولىمىنىڭ باسشىسى ەركەبۇلان جەتپىسبايەۆ وڭىرلىك كوممۋنيكاسيالار قىزمەتىنىڭ بريفينگىندە تاۋار بەلگىلەرىن زاڭسىز پايدالانۋعا قارسى كۇرەس تۋرالى ايتىپ بەردى.
كونترافاكتىلىك ونىمدەر ەل ەكونوميكاسىنا زيان كەلتىرەدى، وندىرۋشىلەردىڭ كىرىسىن ازايتادى، دەپ حابارلايدى aqshamnews.kz.
«بۇگىن ءبىز ەڭ وزەكتى ماسەلەلەرىنىڭ ءبىرى – تاۋار كوشىرمەلەرىمەن كۇرەسۋ جانە ونىڭ بەلگىلەرىنىڭ قۇقىقتارىن قورعاۋدى تالقىلاۋ ءۇشىن جينالدىق. جاھاندانۋ جانە كوممەرسيالىق بەلسەندىلىكتىڭ ءوسۋى داۋىرىندە كونترافاكتىلىك ءونىم ماسەلەسى بارعان سايىن وزەكتى جانە وتكىر بولا تۇسۋدە. ساۋدا بەلگىلەرىن زاڭسىز پايدالانۋ قۇقىق يەلەرىنە زيان كەلتىرىپ قانا قويمايدى، سونىمەن قاتار تۇتىنۋشىلاردىڭ نارىققا دەگەن سەنىمىنە نۇقسان كەلتىرەدى، سونداي-اق، ولاردىڭ دەنساۋلىعى مەن قاۋىپسىزدىگىنە ءقاۋىپ توندىرەدى. الماتى قالاسى قازاقستان رەسپۋبليكاسىنىڭ ماڭىزدى ەكونوميكالىق جانە مادەني ورتالىعى رەتىندە بۇل ماسەلەدەن تىس قالمايدى»، - دەدى ەركەبۇلان جەتپىسبايەۆ.
ول الماتى قالاسى ادىلەت دەپارتامەنتىنىڭ زياتكەرلىك مەنشىك قۇقىقتارى جونىندەگى ءبولىمى قۇقىق يەلەنۋشىلەردىڭ نەمەسە ولاردىڭ زاڭدى وكىلدەرىنىڭ سەنىمحاتى بويىنشا وتىنىشتەرى مەن جۇگىنۋلەرى نەگىزىندە، كىنالى ادامداردى قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 158 – بابى بويىنشا «بوتەننىڭ تاۋار تاڭباسىن زاڭسىز پايدالانۋ، قىزمەت كورسەتۋ بەلگىسى، تاۋار شىعارىلعان جەردىڭ اتاۋى نەمەسە فيرمالىق اتاۋىن زاڭسىز پايدالانۋ» فاكتىسى بويىنشا اكىمشىلىك جاۋاپكەرشىلىككە تارتۋ ءۇشىن بەلسەندى جۇمىس اتقارۋدا ەكەنىن اتاپ ءوتتى.
ادىلەت ورگاندارى قازاقستان رەسپۋبليكاسىنىڭ «ادىلەت ورگاندارى تۋرالى» زاڭىنا، قازاقستان رەسپۋبليكاسىنىڭ «اكىمشىلىك قۇقىق بۇزۋشىلىق تۋرالى» كودەكسىنە، قازاقستان رەسپۋبليكاسىنىڭ «تاۋار بەلگىلەرى، قىزمەت كورسەتۋ بەلگىلەرى، گەوگرافيالىق نۇسقاۋلار جانە تاۋارلار شىعارىلعان جەرلەردىڭ اتاۋلارى تۋرالى» زاڭىنا سايكەس، ءىستى اكىمشىلىك زاڭناما شەڭبەرىندە تاۋار تاڭباسىن زاڭسىز پايدالانۋ فاكتىسى بويىنشا عانا قاراۋعا ۋاكىلەتتى.
«اعىمداعى جىلدىڭ باسىنان باستاپ الماتى قالاسى ادىلەت دەپارتامەنتىنىڭ زياتكەرلىك مەنشىك قۇقىقتارى ءبولىمى مىناداي ناتيجەلەرگە قول جەتكىزدى: 66 اكىمشىلىك قۇقىق بۇزۋشىلىقتىڭ جولىن كەسىپ، ءىس قوزعادى، ونىڭ بارىسىندا 31 ملن 223 مىڭ 523 تەڭگەگە 31 978 كونترافاكتىلىك ءونىم زاڭسىز اينالىمنان الىندى. جوعارىدا كورسەتىلگەن اكىمشىلىك قۇقىق بۇزۋشىلىقتاردى قاراۋ ناتيجەلەرى بويىنشا سوت قۇقىق بۇزۋشىلارعا قاتىستى جالپى سوماسى 4 750 364 تەڭگەگە ايىپپۇل سالدى»، – دەپ ناقتىلادى ە.جەتپىسبايەۆ.
تاۋار تاڭبالارىن زاڭسىز پايدالانۋ ماسەلەلەرى بويىنشا جوسپاردان تىس تەكسەرۋلەر ءارتۇرلى ساناتتار بويىنشا جۇزەگە اسىرىلدى:
- ويىنشىقتار: LEGO- قۇراستىرۋ بولشەكتەرى؛
- كيىم: PUMA، NEW Balance،
- اۆتوموبيل بولشەكتەرى مەن كەرەك – جاراقتارى: KIA/Hyundai – بولشەكتەر، Alca – تازالاعىشتار؛ SKF – مويىنتىرەكتەر؛ MTEC-شامدار؛ WD – 40 – اەروزول؛ Liqui Moly-موتور مايلارى؛
- پارفيۋمەريا جانە كوسمەتيكا: Zielinski & Rozen، Relouis؛
- كەڭسە تاۋارلارى: Cello-قالامدار؛ لۋچ-پلاستيلين؛
- تۇرمىستىق تەحنيكا جانە ەلەكترونيكا: SAMSUNG، LG-تەلەديدارلار؛ ALMACOM-كونديسيونەرلەر؛ Apple، Sony PlayStation-ەلەكترونيكا؛
- كامپيتتەر: ليندت؛
- تۇرمىستىق حيميا: Persil - پەرسيل، Bref - برەف، palet - پالەت.
بريفينگكە قاتىسقان الماتى قالاسى ادىلەت دەپارتامەنتىنىڭ باسپا ءسوز حاتشىسى الماس بەكبوتايەۆ قازاقستان رەسپۋبليكاسىنىڭ زاڭناماسىنا سايكەس بوتەن تاۋار بەلگىلەرىن زاڭسىز پايدالاناتىن قۇقىق بۇزۋشىلار ءۇشىن اكىمشىلىك جاۋاپكەرشىلىك، قىلمىستىق جاۋاپكەرشىلىك جانە ازاماتتىق سوت ءىسىن جۇرگىزۋ كوزدەلگەنىن اتاپ ءوتتى.
«كوشىرمەمەن كۇرەسۋ جانە ساۋدا بەلگىلەرىن قورعاۋ – ءبىزدىڭ الدىمىزدا تۇرعان ماڭىزدى مىندەت. الماتى قالاسىنىڭ ادىلەت دەپارتامەنتى زياتكەرلىك مەنشىك قۇقىقتارىن قورعاۋدى قامتاماسىز ەتە وتىرىپ، ادال جانە اشىق نارىق قۇرۋعا ىقپال ەتە وتىرىپ، وسى باعىتتا بەلسەندى جۇمىس ىستەۋدى جالعاستىرادى. ءبىز زاڭسىزدىقتىڭ جولىن كەسۋ ارقىلى وسى ماڭىزدى سالادا ايتارلىقتاي ناتيجەلەرگە قول جەتكىزە الاتىنىمىزعا سەنىمدىمىز»، – دەپ اتاپ ءوتتى الماس بەكبوتايەۆ.