پرەمەر-مينيستردىڭ ورىنباسارى قانات بوزىمبايەۆ سۋ تاسقىنى سالدارىنان انىقتالعان تج-عا دەن قويۋ پروبلەمالارىن تالداۋ بويىنشا كەڭەس وتكىزدى.
كەڭەس بارىسىندا ءۇش نەگىزگى ماسەلە تالقىلاندى: تج جاعدايىندا جەدەل دەن قويۋ ءۇشىن رەسپۋبليكالىق جانە وڭىرلىك شتابتاردىڭ وكىلەتتىكتەرىن كەڭەيتۋ، تەحنيكا مەن جابدىقتاردى تاسىمالداۋ تەتىگى، سونداي-اق تابيعي اپاتتار كەزىندە مۇلىكتى ساقتاندىرۋ، دەپ حابارلايدى aqshamnews.kz.
ۆيسە-پرەمەر حالىق پەن بيزنەسكە كەلتىرىلگەن زالالدى وتەۋ كەزىندە تۋىنداعان پروبلەمالاردى ەرەكشە اتاپ ءوتتى. قانات بوزىمبايەۆ قارجى، تج، ەڭبەك جانە حالىقتى الەۋمەتتىك قورعاۋ مينيسترلىكتەرىنە زارداپ شەككەندەرگە وتەماقى تولەۋ ءتارتىبىن قايتا قاراۋدى تاپسىردى.
ۇلتتىق ەكونوميكا مينيسترلىگىنىڭ دەرەكتەرى بويىنشا شاعىن جانە ورتا بيزنەس (شوب) سۋبەكتىلەرىنەن جالپى سوماسى 3،4 ملرد تەڭگەگە 291 ءوتىنىم كەلىپ ءتۇستى. قاراجات ءقازىردىڭ وزىندە وڭىرلەرگە ۇكىمەتتىڭ رەزەرۆىنەن ءبولىندى، ءبىراق ءوتىنىش بەرۋشىلەردىڭ ۇشتەن بىرىنە عانا جەتتى. وسىعان بايلانىستى ۆيسە-پرەمەر «اتامەكەن» ۇلتتىق كاسىپكەرلەر پالاتاسىنىڭ ەسكەرتۋلەرىن نازارعا الا وتىرىپ، بيزنەسكە تولەم جاساۋدىڭ ادىستەمەسىن پىسىقتاۋدى، ونىڭ ىشىندە اوك كاسىپكەرلەرىنە كەلتىرىلگەن زالالدى وتەۋدى تاپسىردى.
«مۇنداي بيۋروكراتيا تۇرعىندار اراسىندا نارازىلىق تۋدىرادى. وسى جاعدايدى انىقتاۋ ءۇشىن بۇل ءىستى قولعا الامىن. ءبىز سۋ تاسقىنى تۋرالى ەمەس، سۋ تاسقىنى مىسالىندا ارەكەت ەتۋ جۇيەسىنىڭ دايىندىعى تۋرالى ايتىپ وتىرمىز. ءبىز تج-عا تەز دەن قويىپ، زارداپ شەككەن ازاماتتار مەن شوب ءۇشىن قاجەتتى كومەكتى جەدەل جەتكىزۋىمىز كەرەك. جۇمىس توبىن قۇرىپ، بارلىق راسىمدەردى جەڭىلدەتىڭىزدەر»، — دەدى پرەمەر-مينيستردىڭ ورىنباسارى.
سۋ تاسقىنى كەزىندە تەحنيكانىڭ جەتىسپەۋشىلىگى ماسەلەسى تۋىندادى. ونى باسقا وبلىستاردان كوشىرۋ بويىنشا جەدەل شارالار قابىلداندى. ءبىرقاتار وڭىردە اكىمدەر قولدا بار اۆتوپارك سانى تۋرالى اقپاراتتى بىلمەدى، سوندىقتان ارنايى ەسەپكە الۋدى جولعا قويۋ قاجەت.
«كولىك مينيسترلىگى وسى تالقىلاۋدى ەسكەرە وتىرىپ، تەحنيكانى، ونىڭ ىشىندە جەكە ۇيىمدارمەن تيەۋ، جەتكىزۋ جانە ءتۇسىرۋ الگوريتمىن پىسىقتاۋى قاجەت. ولاردى تج ايماقتارىنا تارتۋ جانە جەتكىزۋ ءۇشىن شىعىنداردى وتەۋ تەتىگىن كوزدەۋ كەرەك. مۇنىڭ ءبارىن زاڭنامالىق تۇرعىدان رەتتەپ، ءبىر اي مەرزىمدە كەلىسىلگەن ۇسىنىستار ەنگىزۋ قاجەت»، — دەپ اتاپ ءوتتى قانات بوزىمبايەۆ
تج كەزىندە ازاماتتاردىڭ مۇلكىن ساقتاندىرۋ ماسەلەلەرى جانە اپاتتار وبليگاسياسىىن شىعارۋ مۇمكىندىگى قارالدى. قارجى نارىعىن رەتتەۋ جانە دامىتۋ اگەنتتىگى اپاتتى تاۋەكەلدەردى ساقتاندىرۋدىڭ ءارتۇرلى مودەلدەرى مەن تاجىريبەلەرىنە تالداۋ جۇرگىزەدى. حالىقارالىق تاجىريبەنى زەردەلەۋ بويىنشا ءوز تالداۋىن «استانا» حالىقارالىق قارجى ورتالىعى دا جۇرگىزدى. ۆيسە-پرەمەر ۇلتتىق ەكونوميكا جانە قارجى مينيسترلىكتەرىنە قنردا جانە احقو-مەن بىرلەسىپ ءبىر اي مەرزىمدە اپاتتى بوندتار شىعارۋ جانە مۇلىكتى ساقتاندىرۋ بويىنشا قاجەتتى ەسەپتەۋلەر جۇرگىزۋدى تاپسىردى.
«ءبىز بۇگىن بيىلعى سۋ تاسقىنى بويىنشا قورىتىندى جاساپ، كەلەسى جىلدىڭ سۋ تاسقىنى كەزەڭىنە دايىندىقتى باستاۋ ءۇشىن ارنايى جينالدىق. ءقازىر ءبىز تۇرعىن ءۇيدى قالپىنا كەلتىرۋ جانە زالالدى وتەۋ بويىنشا بارلىق جۇمىستاردى ۋاقتىلى اياقتاۋىمىز كەرەك. ەڭ باستىسى، زارداپ شەككەندەر كۇزگە دەيىن باسپانامەن قامتاماسىز ەتىلۋى كەرەك. كوكتەمگە دەيىن ءالى الىس. ءبىراق سۋ تاسقىنى كەزەڭىنە دايىندىق شارالارى كۇزدە اياقتالۋى كەرەك. سۋ تاسقىنى قاتەلىكتى، ورىندالماعان جۇمىستاردى جانە جەتكىلىكسىز قارجىلاندىرۋدى كەشىرمەيدى»، — دەپ اتاپ ءوتتى ۆيسە-پرەمەر.
قانات بوزىمبايەۆ تج مەن سۋ رەسۋرستارى جانە يرريگاسيا مينيسترلىكتەرىنە سۋ تاسقىنىنا دايىندىق جانە حالىقتى اپاتتاردان قورعاۋ الگوريتمىن ازىرلەۋدى تاپسىردى. وبلىس اكىمدىكتەرى — سۋ تاسقىنىنىڭ الدىن الۋ شارالارىن قامتاماسىز ەتەدى، بارلىق گيدروتەحنيكالىق جانە قورعانىس قۇرىلىستارىن تەكسەرىپ، اينالما ارنالاردى دايىندايدى. قارجى مينيسترلىگى — ءار وڭىردە توتەنشە رەزەرۆ قۇرۋ جونىندە ۇسىنىستار ەنگىزۋى ءتيىس. ول تۇراقتى، تومەندەتىلمەيتىن، كەلەسى جىلعا اۋىساتىن جانە تەك توتەنشە جاعدايلاردا قولدانىلۋى كەرەك.