الماتىدا №7 قالالىق كلينيكالىق اۋرۋحانا عيماراتىنىڭ قايتا جاڭعىرتۋ جۇمىستارى باستالادى. الداعى كۇندەرى مەردىگەر ۇيىم عيمارات اۋماعى بويىمەن قورشاۋ ورناتادى. قالا اكىمدىگىندە حابارلاعانداي، بارلىق جۇمىستار مەديسينالىق قىزمەتتىڭ كولەمىن قىسقارتپاي جۇرگىزىلەدى.
قۇرىلىس باسقارماسىندا حابارلاعانداي، العاشقى كەزەڭدە 11 بلوكتىڭ 5ء-ىن قايتا جاڭارتۋ جوسپارلانعان. بۇل جۇمىستاردىڭ نورماتيۆتىك مەرزىمى – 20 اي. اۋرۋحانانىڭ ۇزدىكسىز جۇمىسىن قامتاماسىز ەتۋ ءۇشىن جوندەۋ كەزەڭىندە وتا جاساۋ ءبولىمى مەن جانساقتاۋ زالى ۋاقىتشا كوشىرىلەدى، مەكەمەنىڭ شتاتتىق قۇرامى وزگەرمەيدى.
قايتا جاڭعىرتۋ قاجەتتىلىگى ينجەنەرلىك جەلىلەردىڭ 90%-عا، كوتەرگىش كونسترۋكسيالاردىڭ 60%-عا، قاسبەتتەردىڭ 70%-عا توزۋىمەن بايلانىستى. سونداي-اق ءورت قاۋىپسىزدىگى، جەلدەتۋ، گيدرووقشاۋلاۋ جۇيەلەرى مەن جەدەل ساتىلار تالاپتارعا سايكەس كەلمەيدى، مەديسينالىق جابدىقتار دا ەسكىرگەن.
جوبا اياسىندا عيماراتتى سەيسميكالىق تۇرعىدان نىعايتۋ، ينجەنەرلىك كوممۋنيكاسيالاردى، قاسبەتتى، جەلدەتۋ جۇيەسىن، ترانسفورماتورلىق قوسالقىلاردى اۋىستىرۋ، قازاندىق ورناتۋ كوزدەلگەن. سونىمەن بىرگە اۋرۋحانانىڭ پايدالى اۋماعى 2،5 مىڭ شارشى مەترگە ۇلعايىپ، بولىمشەلەر فۋنكسيونالدى تۇردە قايتا بولىنەدى جانە زاماناۋي مەديسينالىق قۇرىلعىلارمەن جابدىقتالادى.
«قازىرگى تاڭدا بولىمدەر ءار بلوك پەن قاباتقا شاشىراپ ورنالاسقان، بۇل لوگيستيكانى قيىنداتادى. جوباعا سايكەس ءبىرىنشى قابات اۋرۋحانانىڭ فرونت-وفيسىنە اينالىپ، اكىمشىلىك پەن امبۋلاتوريالىق ونكوگەماتولوگيا بولىمشەسىنە بولەك كىرەبەرىستەر قاراستىرىلادى. سونداي-اق ءبىرىنشى قاباتتا كۇتۋ ايماعى، تىركەۋ ورنى مەن كلينيكالىق-دياگنوستيكالىق ورتالىق ورنالاسادى. ال قويمالار، ارحيۆ جانە باسقا دا قوسالقى بولمەلەر سوكولگە كوشىرىلەدى. وسىلايشا ناۋقاستار مەن قىزمەتكەرلەر اعىنى قيىلىسپاي، پاسيەنتتەر مەن دارىگەرلەر ءۇشىن قولايلى ءارى تۇسىنىكتى ورتا قالىپتاسادى. قۇرىلىس جۇمىستارىنا بايلانىستى ۋاقىتشا قولايسىزدىقتارعا قالا تۇرعىندارىنىڭ تۇسىنىستىكپەن قاراۋىن سۇرايمىز»، – دەپ اتاپ ءوتتى قۇرىلىس باسقارماسى.