الماتى اكىمى دارحان ساتىبالدى قالانىڭ كولىك ينفراقۇرىلىمىن دامىتۋ ماسەلەسى بويىنشا كەڭەس وتكىزدى. جيىندا LRT، مەترو، BRT جەلىلەرىنىڭ قۇرىلىسى، سونداي-اق راديالدى جانە ماگيسترالدى جولداردى جۇرگىزۋ جوبالارى قارالدى.
قالالىق موبيلدىلىك باسقارماسىنىڭ باسشىسى ساعىندىق تەلىبايەۆتىڭ ايتۋىنشا، ءقازىر ۇزىندىعى 32،5 شاقىرىم بولاتىن LRT جەلىسىنىڭ تەحنيكالىق-ەكونوميكالىق نەگىزدەمەسى ازىرلەنىپ جاتىر. جوباعا سايكەس، الاتاۋ اۋدانىنداعى يندۋستريالدى ايماقتا دەپو سالىنىپ، ول «الماتى-2» تەمىرجول ۆوكزالىنا دەيىن جالعاسادى. سونداي-اق ناۋرىزباي اۋدانىنداعى «بارلىق» بازارىمەن جانە قۇلجا تاس جولى بويىنداعى «شىعىس» تورابىمەن بايلانىس ورناتىلادى. تەن قازان ايىندا اياقتالىپ، ودان كەيىن EPC شارتى اياسىندا جوبالاۋ، قۇرىلىس جانە جابدىق ساتىپ الۋ بويىنشا مەردىگەر انىقتالادى.
مەترو قۇرىلىسىنا قاتىستى اكىمگە مىناداي مالىمەت بەرىلدى: قازىرگى جەلىنى «قالقامان» مەترو بەكەتىنەن «بارلىق» بازارىنا دەيىن ۇزارتۋعا ارنالعان جوبالىق-سمەتالىق قۇجاتتاما دايىن. بۇل ۋچاسكەدە 3 جاڭا بەكەت قاراستىرىلعان. قۇرىلىستى مەملەكەتتىك ساراپتاما قورىتىندىسىنان كەيىن باستاۋ جوسپارلانعان. بۇعان قوسا، «جىبەك جولى» مەترو بەكەتىنەن اۋەجايعا دەيىنگى ەكىنشى جەلىنىڭ تەحنيكالىق-ەكونوميكالىق نەگىزدەمەسى ازىرلەنىپ جاتىر. ول دا قازان ايىندا دايىن بولادى. ال ءۇشىنشى جەلى «سايران» مەترو بەكەتىنەن الاتاۋ قالاسىنا دەيىن سوزىلىپ، بۇل باعىت بويىنشا دا قۇجاتتاما ازىرلەنۋدە.
«قوعامدىق كولىكتى دامىتۋ – قالا ءۇشىن باستى باسىمدىق. LRT، مەترو، BRT – ستراتەگيالىق جوبالار. ولار ءساتتى جۇزەگە اسسا، قالا تۇرعىندارىنىڭ قوزعالىس مۇمكىندىگى ارتىپ، ەكولوگيا جاقسارادى، دەمەك ءومىر ساپاسى دا كوتەرىلەدى. ءبىز جۇمىستى جەدەلدەتۋىمىز كەرەك. ءار كۇن قىمبات. سوندىقتان جوبالاۋ كەزەڭىنەن باستاپ پايدالانۋعا بەرىلگەنگە دەيىن بارلىق جۇمىستى ءوز باقىلاۋىما الامىن»، – دەدى دارحان ساتىبالدى.
كەڭەستە جىبەك جولى – رايىمبەك باتىر كوشەلەرىندە سالىنىپ جاتقان BRT جەلىسى، «الماتى-3» تەمىرجول ۆوكزالىنىڭ قۇرىلىسىنا دايىندىق بارىسى جانە ماگيسترالدى ءارى راديالدى كوشەلەردى جۇرگىزۋ جۇمىستارى باياندالدى. سونداي-اق العاباس، شۇعىلا، اقجار، بورالداي، جاس-قانات، راحات-مادەنيەت، تەرەكتى ىقشام اۋداندارىندا جول سالۋ ماسەلەسى قارالدى.
كەڭەس قورىتىندىسىندا الماتى اكىمى بارلىق جوبالاردىڭ مەرزىمىن قاتاڭ ساقتاۋدى، قۇرىلىس پەن جوبالاۋدا ساپانى قامتاماسىز ەتۋدى تاپسىردى. ءار جوبا بويىنشا ناقتى مەرزىمى مەن جاۋاپتى ورىنداۋشىلارى كورسەتىلگەن جول كارتاسىن ازىرلەۋ جۇكتەلدى.