الماتى قالالىق پد كوشى-قون قىزمەتىنىڭ مالىمەتىنشە، جىل باسىنان بەرى قالاعا 23 مىڭعا جۋىق شەتەل ازاماتى كەلگەن، دەپ حابارلايدى Almaty-akshamy.kz Polisia.kz-كە سىلتەمە جاساپ.
«الماتى – ينفراقۇرىلىمى دامىعان، وزىندىك مادەنيەتى بار شاھار، سوندىقتان الىس جانە جاقىن شەتەلدەردەن كەلگەن شەتەلدىكتەردىڭ قىزىعۋشىلىعىن وياتادى. كوشى-قون اعىنى جىل سايىن ارتىپ كەلەدى. بۇل ەكونوميكاعا وڭ اسەرىن تيگىزگەنىمەن، جالپى قىلمىستىق جاعدايعا كەرى اسەرىن تيگىزىپ جاتىر. ياعني قۇقىق بۇزۋشىلىق سانى ءوسىپ جاتىر. اۋىر قىلمىس تىركەلۋدە. ماسەلەن، الماتىنىڭ تۇركسىب اۋدانىندا شەتەل ازاماتى ءوزىنىڭ تانىسىن ولتىرگەن. ال مەدەۋ اۋدانىندا ءۇندىستان مەن پاكىستاننىڭ ەكى ازاماتى سينتەتيكالىق ەسىرتكى شىعاراتىن زەرتحانا ۇيىمداستىرعان. شەتەلدىك ستۋدەنتتەردىڭ قاتىسۋىمەن بولاتىن توبەلەستەر دە كوپتەپ كەزدەسەدى»، – دەدى الماتى قالالىق پد كوشى-قون قىزمەتى باسقارماسىنىڭ باستىعى اسحات بۋتۋنچينوۆ.
سونداي-اق بۋتۋنچينوۆتىڭ سوزىنشە، الماتىدا قر-نىڭ كوشى-قون زاڭناماسىن بۇزۋشىلىقتاردى انىقتاۋ جانە جولىن كەسۋ ماقساتىندا تۇراقتى نەگىزدە جەدەل-پروفيلاكتيكالىق ءىس-شارالار جۇرگىزىلىپ جاتقانىن اتاپ ءوتتى.
جىل باسىنان بەرى قازاقستاننىڭ كوشى-قون زاڭناماسىن بۇزعانى ءۇشىن 8 مىڭنان استام ادام اكىمشىلىك جاۋاپكەرشىلىككە تارتىلسا، ونىڭ 4 مىڭعا جۋىعى شەتەل ازاماتتارى ەكەن. جالپى، سوت شەشىمىمەن 682 شەتەلدىك ەلدەن شىعارىلدى. الماتى پوليسياسى ەلگە كەلەتىن شەتەل ازاماتتارىنا قازاقستان رەسپۋبليكاسىنىڭ زاڭناماسىن قاتاڭ ساقتاۋ قاجەتتىگىن ەسكە سالادى.