الماتىدا حالىقارالىق Almaty Tech Cup 2025 چەمپيوناتى باستالدى، دەپ حابارلايدى Aqshamnews.kz
بايقاۋعا قازاقستان، ءۇندىستان، تۇركيا، موڭعوليا، تۇرىكمەنستان، قىرعىزستان جانە وزبەكستاندى قوسا العاندا، 10 ەلدەن 3 000-نان استام جاس ينجەنەر مەن روبوتوتەحنيك قاتىسۋدا. روبوتوتەحنيكا، ينجەنەريا جانە درون جارىستارىندا ب ا ق سىنايتىن 400 كوماندانىڭ ىشىندە 20-سى شەتەلدەن كەلگەن. چەمپيوناتتىڭ باستى جۇلدەسى – الماتى قالاسى اكىمىنىڭ كۋبوگى ەڭ كوپ ۇپاي جيناعان كومانداعا بەرىلەدى.
درون جارىستارى مەن روبوتوتەحنيكا سايىستارى ءارتۇرلى جاستاعى قاتىسۋشىلار ءۇشىن ۇيىمداستىرىلعان – ەڭ كىشكەنتايىنان باستاپ جوعارى سىنىپ وقۋشىلارىنا دەيىن. ءۇش كۇن بويى باعدارلامالاۋ، مەحانيكا جانە درون ۇشىرۋ شەبەرلەرى ءوز ەلىن حيۋستوندا (اقش) وتەتىن الەمدىك چەمپيونات – FIRST Championship-تە تانىستىرۋ قۇقىعى ءۇشىن جارىسادى. جەڭىمپازدار نەگىزگى جۇلدەدەن بولەك، قازاقستاننىڭ جەتەكشى جوعارى وقۋ ورىندارىنىڭ ءبىلىم گرانتتارىنا يە بولادى.
ايتا كەتەيىك، بىلتىر الماتى قۇراماسى اقش-تىڭ داللاس قالاسىندا وتكەن الەم چەمپيوناتىندا ۇزدىك وندىققا ەنگەن بولاتىن. بۇعان دەيىن الماتىنىڭ جاس ينجەنەرلەرى 2022 جىلى جەنيەۆادا، 2023 جىلى سينگاپۋردا جانە 2024 جىلى افينادا وتكەن الەم چەمپيوناتتارىندا ءۇش مارتە التىن مەدال جەڭىپ الدى.
— “روبوتوتەحنيكا، باعدارلامالاۋ جانە ينجەنەريا – ەرتەڭگى كۇننىڭ ماماندارىن دايارلاۋداعى باستى باعىتتار. Almaty Tech Cup سياقتى چەمپيوناتتار وقۋشىلارعا تەك تەحنيكالىق داعدىلاردى عانا ەمەس، سونىمەن قاتار كوماندالىق جۇمىس، سىني ويلاۋ جانە كوشباسشىلىق قاسيەتتەرىن دامىتۋعا كومەكتەسەدى. قازاقستان 2017 جىلدان باستاپ حالىقارالىق روبوتوتەحنيكا چەمپيوناتتارىنا قاتىسىپ كەلەدى جانە وسى ۋاقىت ىشىندە ءبىزدىڭ وقۋشىلارىمىز زور جەتىستىكتەرگە جەتتى. قازاق جاستارىنىڭ الەۋەتى وتە جوعارى ەكەنىن كورىپ وتىرمىز. ءبىزدىڭ ماقساتىمىز – الماتى اكىمدىگىنىڭ قولداۋىمەن بالالاردىڭ دامۋىنا جاعداي جاساۋ. Almaty Tech Cup سىندى چەمپيوناتتار بۇل باعىتتاعى ماڭىزدى قۇرال بولىپ تابىلادى”، – دەدى الماتى قالاسى ءبىلىم باسقارماسىنىڭ باسشىسى سايران سايفەدەنوۆ.
Almaty Tech Cup 2025 – ورتالىق ازياداعى بيىلعى جىلدىڭ ەڭ ءىرى ينجەنەرلىك-تەحنيكالىق وقيعاسى. چەمپيونات «اتاكەنت» كورمە كەشەنىنىڭ №11 پاۆيلونىندا وتۋدە. باعدارلامادا درون جارىستارىنىڭ ASPAN Cyber Race، ASPAN Drone Competition، ASPAN Whoop Race جانە ASPAN Drone Race سياقتى باعىتتارى بار. سونىمەن قاتار، ءارتۇرلى جاستاعى قاتىسۋشىلارعا ارنالعان روبوتوتەحنيكا سايىستارى ۇيىمداستىرىلعان:
• FIRST LEGO LEAGUE Discover (4-6 جاس)
• FIRST LEGO LEAGUE Explore (6-12 جاس)
• FIRST LEGO LEAGUE Challenge (12-16 جاس)
• FIRST Tech Challenge (16-18 جاس)
22 اقپاندا ىرىكتەۋ كەزەڭدەرى وتسە، فينالدىق ويىندار مەن ماراپاتتاۋ ءراسىمى جەكسەنبى، 23 اقپاندا وتەدى. چەمپيونات تۋرالى تولىق اقپاراتتى رەسمي سايتتان الۋعا بولادى: almatytechcup.kz