2024 جىلى قازاقستانعا 15،9 مىڭ توننا كيىم اكەلىنىپ، ونىڭ قۇنى 2،2 ميلليارد اقش دوللارىن قۇرادى. بۇل وتكەن جىلمەن سالىستىرعاندا كولەمى بويىنشا 13%-عا، ال اقشا تۇرعىسىنان 36،6%-عا تومەندەگەن. الايدا، يمپورت كولەمىنىڭ قىسقارعانىنا قاراماستان، باعا وسكەنى توقتار ەمەس، دەپ حابارلايدى aqshamnews.kz.
تمد ەلدەرىنەن 49،8 مىڭ توننا كيىم يمپورتتالدى، بۇل 2023 جىلمەن سالىستىرعاندا 21،7%-عا ارتىق. ەڭ ءىرى جەتكىزۋشىلەر قاتارىندا رەسەي (28،7 مىڭ توننا)، وزبەكستان (28،7 مىڭ توننا)، بەلارۋس (20،1 مىڭ توننا)، قىرعىزستان (694،4 توننا) جانە تاجىكستان (105،3 توننا) بار.
تمد ەلدەرىنەن تىس جەرلەردەن اكەلىنگەن كيىم يمپورتى 23%-عا قىسقارىپ، 109،9 مىڭ توننانى قۇرادى. نەگىزگى جەتكىزۋشىلەر — جۇڭگو (85،5 مىڭ توننا)، تۇركيا (15،3 مىڭ توننا) جانە بانگلادەش (4،7 مىڭ توننا).
باعالارعا قاتىستى، 2025 جىلدىڭ قاڭتار ايىندا قازاقستانداعى سىرت كيىم باعاسى 2024 جىلدىڭ قاڭتارىمەن سالىستىرعاندا 10%-عا ءوستى. باعانىڭ ەڭ كوپ ءوسۋى تۇركىستان (19،1%)، شىعىس قازاقستان (15،6%) جانە اباي (13،8%) وبلىستارىندا بايقالدى. پاۆلودار جانە جامبىل وبلىستارىندا ەڭ تومەنگى جىلدىق باعا ءوسۋى تىركەلىپ، ءارقايسىسىندا 5،4%-دى قۇرادى.
ەرلەر كيىمى ورتا ەسەپپەن 9،9%-عا، ايەلدەر كيىمى 10،3%-عا، بالالار كيىمى 9،7%-عا قىمباتتادى.