ءبىلىم باسەكەسىنىڭ سالتاناتتى اشىلۋى Almaty Theatre ساحناسىندا ءوتتى. ءىس-شاراعا مىڭعا جۋىق قوناق پەن قاتىسۋشى جينالدى.
10–15 قاڭتار ارالىعىندا مەكتەپ وقۋشىلارىنا ارنالعان ماتەماتيكا، فيزيكا جانە ينفورماتيكا پاندەرى بويىنشا 22ء-شى حالىقارالىق جاۋتىكوۆ
وليمپياداسى وتپەك.
بيىل الەمنىڭ 16 ەلىنەن 612 وقۋشى مەن 122 جەتەكشى كەلىپ وتىر. قاتىسۋشى كوماندالار ۇلتتىق وليمپيادالاردىڭ قورىتىندىسى بويىنشا ىرىكتەلگەن.
بەس كۇنگە سوزىلاتىن سايىس ەكى تۋردان – تەوريالىق جانە پراكتيكالىق كەزەڭدەردەن تۇرادى. تاپسىرمالار مامانداندىرىلعان سىنىپتاردىڭ وقۋ باعدارلاماسىنا سايكەس ازىرلەنگەن.
وليمپيادا قورىتىندىسى بويىنشا جەڭىمپازدار مەن جۇلدەگەرلەر ديپلومدارمەن، سونداي-اق التىن، كۇمىس جانە قولا مەدالدارمەن ماراپاتتالادى.
“بۇل وليمپيادانىڭ باستى ەرەكشەلىگى – ونىڭ ءارى جەكە، ءارى كوماندالىق فورماتتا وتۋىندە. كوماندالار مىندەتتى تۇردە ءبىر مەكتەپتەن جاساقتالۋى ءتيىس. وسى ارقىلى ءبىز فيزيكا-ماتەماتيكا جانە STEM باعىتىنداعى ۇزدىك مەكتەپتەردى انىقتايمىز”،-دەيدى ۇيىمداستىرۋشىلار.
سونداي-اق، بيىلدان باستاپ سايىسقا قاتىسۋعا شەكتەۋ دە ەنگىزىلگەن. ەندى ءار مەملەكەتتەن 4 كوماندا عانا قاتىسا الادى. ال وتكەن جىلعى كوماندالىق جەڭىمپاز اتانعان 7 كوماندا كۆوتاسىز قاتىسۋ مۇمكىندىگىنە يە بولدى.
“حالىقارالىق جاۋتىكوۆ وليمپياداسى بيىل الماتى قالاسىندا وتۋدە. بۇعان دەيىن 20 رەت الماتىدا ۇيىمداستىرىلسا، بىلتىر وليمپيادا استانا قالاسىندا وتكەن بولاتىن. بيىل قايتادان الماتىدا وتكىزىپ وتىرمىز. شەتەلدەن 45 كوماندا كەلدى. ءار كوماندادا 7 وقۋشى مەن 2 جەتەكشى بولادى. وقۋشىلار پاندەر بويىنشا بولىنەدى، ياعني 3 ماتەماتيك، 2 فيزيك جانە 2 ينفورماتيك. وليمپيادا اياسىندا مۇعالىمدەرگە ارنالعان ماتەماتيكا، فيزيكا جانە ينفورماتيكا پاندەرى بويىنشا «IMPACT» اتتى قوسىمشا وليمپيادا دا وتەدى”، - دەيدى «رەسپۋبليكالىق فيزيكا-ماتەماتيكا مەكتەپتەرى» كوممەرسيالىق ەمەس اكسيونەرلىك قوعامى باسقارما ءتوراعاسىنىڭ ءبىرىنشى ورىنباسارى الماس كۇنگوجين.
حالىقارالىق كوميسسيانىڭ ءتوراعاسى، اكادەميك اسقار جۇمادىلدايەۆتىڭ ايتۋىنشا، وقۋشىلارعا عىلىمعا نەگىزدەلگەن، مازمۇنى تەرەڭ، كۇردەلى ەسەپتەر بەرىلەدى. بارلىق تاپسىرما وقۋ باعدارلاماسىنا سايكەس بولعانىمەن، ولاردى ورىنداۋ جوعارى دايىندىقتى تالاپ ەتەدى.
“جاۋتىكوۆ وليمپياداسى - الەمدىك دەڭگەيدە ۇيىمداستىرىلاتىن حالىقارالىق مارتەبەگە يە رەسپۋبليكاداعى جالعىز پاندىك وليمپيادا. الەمدىك وليمپيادالىق كۇنتىزبە جىل باسىندا ءدال وسى جاۋتىكوۆ وليمپياداسىنان باستالادى. بىزدەن ەرتە وتەتىن مۇنداي حالىقارالىق دەڭگەيدەگى وليمپيادا جوق. بيىلعى وليمپياداعا پاكىستان العاش رەت قاتىسىپ وتىر. العاشقى جىلدارى ۆەتنام، كامبودجا جانە جۇڭگو سياقتى مەملەكەتتەر دە قاتىسۋى مۇمكىن. بۇل وليمپيادانىڭ حالىقارالىق اۋقىمىنىڭ كەڭەيىپ كەلە جاتقانىن كورسەتەدى”،- دەيدى اكادەميك.
جاۋتىكوۆ وليمپياداسىنا بيىل ءۇشىنشى مارتە قاتىسىپ وتىرعان الماتىلىق وقۋشى ءادىل جيەنبايەۆ جارىسقا ءتاستۇيىن دايىن.
“رەسپۋبليكالىق فيزيكا-ماتەماتيكا مەكتەبىندە 11-سىنىپ وقيمىن. وليمپيادا تاپسىرمالارى ءوتى كۇردەلى، مەكتەپتەگى ۇستازىم ينتەنسيۆتى تۇردە دايىندايدى. اسرەسە، ەكپەريمەنتالدى تۋرعا دايىندىعىم جوعارى. جاقسى ناتيجە كورسەتۋ ءۇشىن بار كۇشىمىزدى سالامىز”،- دەدى ءادىل.