تەمىرتاۋدا ەكى قاباتتى تۇرعىن ۇيدەگى پاتەردىڭ بىرىندە توبە وپىرىلىپ ءتۇستى. باسپانادا ەشكىم بولماعان. توزىعى جەتكەن ۇيدەگى باسقا تۇرعىندار قيراندىنىڭ استىندا قالامىز با دەپ قورقىپ وتىر، - دەپ حابارلايدى aqshamnews.kz ءتىلشىسى "كتك" تەلەارناسىنا سىلتەمە جاساپ.
"ءۇيدىڭ توزىعى جەتكەن، ەسكى. شاتىردان سۋ اعادى، تەسىك، قار كىرەدى. ونى جوندەۋگە تۇرعىنداردىڭ شاماسى جەتپەيدى. ءبارى زەينەتكەر. اكىمدىككە سان رەت ارىز جازدىق. ءبىراق ەش قوزعالىس جوق"، - دەدى ليۋبوۆ نيكولايەۆا.
1950 جىلدارى سالىنعان ءۇيدىڭ ابدەن توزىعى جەتكەن. مۇندا تۇراتىنداردىڭ دەنى جوندەۋ تۇگىلى، كۇنىن ارەڭ كورىپ وتىر. ال توبەسى وپىرىلعان پاتەر جەكەشەلەنبەگەن، جەرگىلىكتى اكىمدىك بالانسىنداعى مۇلىك ەكەن. قاراۋسىز، قاڭىراپ بوس تۇرعان. ونىڭ تەحنيكالىق جايىنا باس اۋىرتقان ءبىر جاۋاپتى بولماعان. ارىزدانعاندا عانا توبەسىن كورسەتىپ، قاراسىن باتىرادى ەكەن. تۇرعىندار "ەندى ىشىندە ادامى بار پاتەرلەردىڭ توبەسى وپىرىلسا قايتەمىز" دەيدى. جەرگىلىكتى اكىمدىك توتەنشە جاعدايدان سوڭ عانا ارەكەت ەتە باستايمىز دەيدى.
"جوندەۋ جۇرگىزۋ ءۇشىن عيماراتتى تولىق تەكسەرىپ شىعىپ، جوبا-سمەتاسىن ازىرلەۋىمىز كەرەك. تەحنيكالىق بايقاۋدان سوڭ، ەگەر ءۇي اپاتتى دەپ تانىلماسا، نىسانعا جوندەۋ جۇرگىزۋ مەسەلەسى قارالادى. ول دا بەلگىلى ءبىر مەرزىمدى تالاپ ەتەدى"، - دەيدى تەمىرتاۋ اكىمدىگى تۇرعىن ءۇي سەكتورىنىڭ جەتەكشىسى ساۋلە قانىشيەۆا.