الماتىدا 150 مىڭنان استام مەكتەپ وقۋشىسى CodiPlay ءبىلىم بەرۋ پلاتفورماسىنىڭ كومەگىمەن سمارتفون ارقىلى پروگراممالاۋ تىلدەرىن مەڭگەرۋدە.
بۇل تۋرالى CodiPlay كومپانياسىنىڭ قازاقستانداعى كەڭسەسىنىڭ ديرەكتورى اليار كاديكەنوۆ الماتى قالاسىنىڭ وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا مالىمدەدى، دەپ حابارلايدى aqshamnews.kz.
ونىڭ ايتۋىنشا، جوبا قالاداعى 117 مەكتەپتى قامتىپ، جاستاردىڭ سيفرلىق تەحنولوگيالارعا دەگەن قىزىعۋشىلىعىنىڭ ارتىپ كەلە جاتقانىن كورسەتۋدە. وقۋشىلار 1-سىنىپتان باستاپ ءوز بەتىمەن «شلاگباۋم» جانە «جول باعدارشامى» سىندى جوبالاردى جاساپ، ءوز ەڭبەكتەرىنىڭ ناتيجەسىن ينتەراكتيۆتى قۇرىلعىلار تۇرىندە باقىلاي الادى.
CodiPlay – 2021 جىلى قۇرىلعان قازاقستاندىق ءبىلىم بەرۋ پلاتفورماسى. بۇگىندە بۇل جوبا قازاقستانمەن قاتار، شەتەلدە دە تانىمال بولىپ، الەم بويىنشا 1 ميلليوننان استام قولدانۋشىنى قامتىپ وتىر. پلاتفورما ۇلىبريتانيا، وڭتۇستىك كورەيا، تۇركيا جانە بىرىككەن اراب امىرلىكتەرى مەكتەپتەرىنىڭ وقۋ باعدارلاماسىنا ەنگىزىلگەن. 2024 جىلى قازاقستاننىڭ پرەمەر-مينيسترى ولجاس بەكتەنوۆ وقۋ-اعارتۋ مينيسترلىگى مەن جەرگىلىكتى اتقارۋشى ورگاندارعا CodiPlay جوباسىن مەكتەپتەردە كەڭىنەن ەنگىزۋ تۋرالى تاپسىرما بەردى. بۇل باستاما وقۋشىلاردىڭ سيفرلىق داعدىلارىن ءتيىمدى تۇردە دامىتۋعا باعىتتالعان.
اليار كاديكەنوۆتىڭ ايتۋىنشا، CodiPlay پلاتفورماسىندا وقيتىن الماتىلىق وقۋشىلاردىڭ سيفرلىق ساۋاتتىلىق دەڭگەيى ايتارلىقتاي جوعارى.
«بالالار سيفرلىق ورتاعا تەز بەيىمدەلىپ، پلاتفورمانىڭ ينتەرفەيسىن وڭاي مەڭگەرەدى جانە پروگراممالاۋعا قىزىعۋشىلىق تانىتادى. CodiPlay: لوگيكا مەن الگوريتمدەردىڭ نەگىزدەرىنەن باستاپ، جەكە جوبالاردى جاساۋعا دەيىن وقىتۋدىڭ قادامدىق جۇيەسىن ۇسىنادى: . بۇل ءاربىر وقۋشىعا، ونىڭ دايىندىق دەڭگەيىنە قاراماستان، ماتەريالدى ءساتتى يگەرۋگە مۇمكىندىك بەرەدى»، – دەدى ول.
ءوز كەزەگىندە، CodiPlay مەملەكەتتىك قىزمەتتەرمەن جۇمىس جونىندەگى دەپارتامەنتىنىڭ ديرەكتورى نۇرعالي تۇرىمبەتوۆ جوبانىڭ باستى ماقساتى IT-ماماندارىن عانا دايارلاۋ ەمەس ەكەنىن اتاپ ءوتتى. جوبانىڭ نەگىزگى مىندەتى – بالالاردى سيفرلاندىرۋ داۋىرىنە بەيىمدەۋ، ويتكەنى بۇگىنگى تاڭدا سيفرلىق داعدىلار ءومىردىڭ اجىراماس بولىگىنە اينالۋدا. پروگراممالاۋ – لوگيكالىق جانە كرەاتيۆتى ويلاۋدى، ماسەلەنى شەشۋ جانە تەحنولوگيامەن جۇمىس ىستەۋ قابىلەتىن دامىتاتىن قۇرال.
«الماتى وقۋشىلارىنىڭ پروگراممالاۋعا دەگەن قىزىعۋشىلىعى جوعارى جانە ولار ءارتۇرلى. بىرەۋلەر ءۇشىن بۇل – ءوز يدەيالارىن جۇزەگە اسىرۋ مۇمكىندىگى، مىسالى: ويىندار نەمەسە انيماسيالار جاساۋ. ال باسقالارى ءۇشىن – سيفرلىق الەمنىڭ قالاي جۇمىس ىستەيتىنىن تەرەڭىرەك ءتۇسىنۋدىڭ جولى»، – دەدى تۇرىمبەتوۆ.
قازاقستان پرەزيدەنتى قويعان جىل سايىن 1000 جوعارى دەڭگەيلى IT-مامان دايارلاۋ مىندەتى اياسىندا CodiPlay سياقتى EdTech جوبالارىنىڭ دامۋى ەرەكشە ماڭىزعا يە بولىپ وتىر. كومپانيانىڭ پىكىرىنشە، ءبىلىم بەرۋ تەحنولوگيالار نارىعىنداعى باسەكەلەستىك شەشىمدەردىڭ ساپاسىن ارتتىرۋعا ىقپال ەتەدى.
«ءبىلىم بەرۋ ونىمدەرى نەعۇرلىم كوپ بولسا، باسەكەلەستىك سوعۇرلىم جوعارى بولادى، ال بۇل ءوز كەزەگىندە ەڭ مىقتى جانە ساپالى شەشىمدەردىڭ ومىرشەڭدىگىن قامتاماسىز ەتەدى»، – دەپ اتاپ ءوتتى تۇرىمبەتوۆ.
CodiPlay ساپالى كونتەنت پەن ءتيىمدى وقىتۋ ادىستەرىن ازىرلەۋگە باسىمدىق بەرىپ، وقۋشىلارعا IT-نەگىزدەرىن ۇيرەتىپ قانا قويماي، ولاردى سيفرلىق الەمدە تابىستى مانساپقا دايىنداۋعا كومەكتەسۋدە.