الماتىدا جاساندى ينتەللەكت نەگىزىندەگى بەينەمونيتورينگ جانە اناليتيكالىق جۇيەلەر قارقىندى دامىپ كەلەدى. بۇل قالا تۇرعىندارىنىڭ قاۋىپسىزدىگى مەن جايلىلىعىن ارتتىرۋعا مۇمكىندىك بەرەدى. بۇل تۋرالى الماتى قالاسى سيفرلاندىرۋ باسقارماسى باسشىسىنىڭ ورىنباسارى مەيرام ديۋسيۋكوۆ وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسياسىندا مالىمدەدى.
«قازىرگى ۋاقىتتا الماتىدا 45 مىڭ بەينەباقىلاۋ كامەراسى جۇمىس ىستەپ تۇر. كەلەسى جىلى ولاردىڭ سانى 70 مىڭعا دەيىن ارتادى. بۇل قالاداعى قوعامدىق قاۋىپسىزدىكتى باقىلاۋ تيىمدىلىگىن ەداۋىر جاقسارتادى»، – دەدى سپيكەر.
قالالىق بەينەمونيتورينگ جۇيەسى ادامدار كوپ شوعىرلانعان ورىنداردى انىقتاپ قانا قويماي، انىتقالعان ادامداردىڭ مىنەز-قۇلقىن تالدايدى، سونداي-اق توبەلەستەر مەن كۇدىكتى زاتتاردى تىركەيدى، قوعامدىق ورىنداردا قارۋدى تانىپ، قوعامدىق ءتارتىپ بۇزۋشىلىقتاردى، ورتتەر مەن تۇتىندەنۋدى انىقتاۋ مۇمكىندىكتەرىنە يە.
«كەلەسى جىلى ءبىز جاڭا فۋنكسيالاردى ەنگىزۋدى جوسپارلاپ وتىرمىز. ونىڭ ىشىندە: زاڭسىز قوقىس ۇيىندىلەرىن انىقتاۋ، قوعامدىق كولىكتەردى باقىلاۋ جانە قاڭعىباس جانۋارلاردى انىقتاۋ جۇيەلەرى بار»، – دەپ اتاپ ءوتتى ديۋسيۋكوۆ.
تاعى ءبىر ماڭىزدى جاڭاشىلدىق – Cell Broadcast تەحنولوگياسىن قولدانۋ ارقىلى جەدەل ەسكەرتۋ جۇيەسىنىڭ ەنگىزىلۋى.
بۇل تەحنولوگيا ءموبيلدى جەلىلەرگە شامادان تىس جۇكتەمە تۇسىرمەي، ازاماتتارعا شۇعىل حابارلامالاردى جىلدام جەتكىزۋگە مۇمكىندىك بەرەدى.
«سىناق بارىسىندا جۇيە ۇيالى وپەراتورلاردىڭ 47 مىڭ بازالىق ستانسيا سەكتورلارىن وڭدەپ، 99،6% ءساتتى حابار تاراتۋ كورسەتكىشىنە قول جەتكىزدى»، – دەدى ديۋسيۋكوۆ.