الماتىدا «جايلى مەكتەپ» ۇلتتىق جوباسى اياسىنداعى قۇرىلىس قارقىندى جالعاسۋدا، دەپ حابارلايدى aqshamnews.kz
قالا اكىمىنىڭ ورىنباسارى بەيبىت شاحانوۆ جاڭا وقۋ ورىندارىنىڭ قۇرىلىس بارىسىن تەكسەردى.
قازىرگى تاڭدا مەگاپوليستە 11 700 وقۋشىعا ارنالعان 8 جاڭا مەكتەپتىڭ قۇرىلىسى ءجۇرىپ جاتىر. نىساندار قالانىڭ ءار اۋدانىندا Qazaq Stroy، Azimut، Time Group Construction جانە BI Group سىندى جەكە كومپانيالاردىڭ قاراجاتى ەسەبىنەن سالىنۋدا. قۇرىلىس اياقتالعان سوڭ مەكتەپتەر الماتى قالاسىنىڭ كوممۋنالدىق مەنشىگىنە بەرىلەدى.
قۇرىلىس كومپانيالارىنىڭ وكىلدەرى بارلىق جۇمىس بەلگىلەنگەن مەرزىمدە اياقتالاتىنىن اتاپ ءوتتى.
«ءبىزدىڭ باستى ماقساتىمىز – بالالاردىڭ ءۇشىنشى توقساننان باستاپ وقۋىن جاڭا مەكتەپتەردە جالعاستىرۋى. ەشقانداي سىلتاۋ قابىلدانبايدى. ءبىراق جىلدامدىق ساپاعا اسەر ەتپەۋى كەرەك. مەكتەپتەردىڭ جابدىقتالۋى، سپورت الاڭدارىنىڭ ساپاسى جانە اباتتاندىرۋ دەڭگەيى جوعارى ستاندارتتارعا ساي بولۋى ءتيىس»، – دەدى بەيبىت شاحانوۆ.
بيىل الماتىدا ۇلتتىق جوبا اياسىندا اكىمدىك جانىنداعى جوبالىق كەڭسەنىڭ قولداۋىمەن 22،5 مىڭ وقۋشىعا ارنالعان 12 مەكتەپتىڭ قۇرىلىسى اياقتالدى. ونىڭ ىشىندە 7 مەكتەپ جاڭا وقۋ جىلىنىڭ باسىندا اشىلدى، ال 5 مەكتەپ ەكىنشى توقساندا وقۋشىلاردى قابىلدايدى.