ەر بالانىڭ شاشتى، جۇننەن جاسالعان بۇيىمداردى، كيىزدى شايناپ، جۇتاتىن جامان ادەتى بولعان.
الماتىلىق حيرۋرگتار بالانىڭ اسقازانىنان 900 گرامم شاش پەن ءجۇندى الىپ تاستادى دەپ حابارلايدى، - دەپ حابارلايدى اlmaty-akshamy.kz الماتى قالاسىنىڭ №2 قالالىق بالالار كلينيكالىق اۋرۋحاناسىنىڭ باسپا ءسوز قىزمەتىنە سىلتەمە جاساپ.
10 جاستاعى بالا الماتىنىڭ №2 بالالار قالالىق كلينيكالىق اۋرۋحاناسىنا ءىشى اۋىرىپ، قۇسىپ، ءالسىز، مازاسىز بولىپ تۇسكەن. اناسى بالانىڭ اۋزىنا بوگدە زاتتاردى سالاتىن ادەتى بار ەكەنىن ەسكەرتكەن. كومپيۋتەرلىك توموگرافياعا تۇسىرگەن سوڭ اسقازاندا بوگدە زات بارى انىقتالدى.
وپەراتور مارات كاپتاعايەۆ، اسسيستەنت ازات ولجابايەۆ جانە انەستەزيولوگ-رەانيماتولوگ جاندوس شولاقوۆ 90 مينۋتقا سوزىلعان وپەراسيانى ءساتتى اياقتادى، اسقازان مەن ون ەكى ەلى ىشەكتەن تريحوبەزوار الىندى. ەر بالانىڭ اسقازانىندا ديامەترى 20 جانە 15 سانتيمەتر، شىرىش پەن تاماق قوسپاسى بار 900 گراممدىق شاش پەن ءجۇن الىندى. ەر بالانىڭ شاش، جۇننەن جاسالعان بۇيىمداردى، كىلەم، كيىز شايناپ، جۇتاتىن جامان ادەتى بولعان. ۇيدە بالا كىلەمنىڭ تۇگىن جەگەنى انىقتالدى.
«الماتى قالاسىنىڭ № 2 بقكا باس دارىگەرى مارات راباندياروۆتىڭ ايتۋىنشا، اسقازان-ىشەك جولدارىنىڭ تريحوبەزوارى - وتە سيرەك كەزدەسەتىن پاتولوگيا، ءبىراق قازىرگى زامانعى ابدومينالدى حيرۋرگيانىڭ وزەكتى ماسەلەسى».
№2 بالالار اۋرۋحاناسىنىڭ دارىگەرلەرى بەزواردىڭ اۋىر جانە ومىرگە ءقاۋىپ توندىرەتىن اسقىنۋلارعا اكەلۋى مۇمكىن ەكەنىن اتاپ ءوتتى.
«اتا-انالار بالالارىنىڭ پاتولوگيالىق مىنەز-قۇلقىنا باسا نازار اۋدارۋى قاجەت. جامان ادەتتەر بولسا، دەرەۋ ماماندارعا، پسيحولوگتارعا (پسيحوتەراپيەۆتتەرگە)، نيەۆروپاتولوگتارعا، گاستروەنتەرولوگتارعا جۇگىنگەن ابزال».