ق ر پرەزيدەنتى جانىنداعى ورتالىق كوممۋنيكاسيالار قىزمەتىندە وتكەن باسپا ءسوز كونفەرەنسياسىندا الماتى اكىمى باقىتجان ساعىنتايەۆ «جاڭا الماتىنى» دامىتۋدىڭ 2020-2024 جىلدارعا ارنالعان كەشەندى جوسپارى اياسىندا حالىقتىڭ ءومىر سۇرۋىنە قولايلى جاعداي جاساۋ، قوعامدىق كەڭىستىكتەر مەن پوليورتالىقتى قالىپتاستىرۋ تۋرالى ايتىپ بەردى، دەپ حابارلايدى اlmaty-akshamy.kz
«جاڭا الماتىنى» دامىتۋدىڭ كەشەندى جوسپارىنىڭ ءىس-شارالارىن ىسكە اسىرۋدى جىل سايىن قارجىلاندىرۋ شامامەن 200 ملرد تەڭگەنى قۇرايدى. بۇگىندە جوسپار اياسىندا قالانى دامىتۋدىڭ پوليورتالىقتى مودەلىن ەسكەرە وتىرىپ، قالا شەتىندەگى كولىك، بيزنەس جانە الەۋمەتتىك ينفراقۇرىلىمدى جاقسارتۋ بويىنشا 286 جوبا ىسكە اسىرىلۋدا.
حالىقتى اۋىز سۋمەن قامتاماسىز ەتۋ باستى مىندەت بولىپ تابىلادى. سۋ قۇبىرى جەلىلەرىنىڭ قۇرىلىسى جالعاسۋدا جانە بۇگىنگى كۇنى الماتى تۇرعىندارىنىڭ 98،5%-ى ورتالىق سۋمەن جابدىقتالعان.
قالاعا قوسىلعان اۋماقتارداعى سۋ تاپشىلىعى ماسەلەسىن شەشۋ ءۇشىن كەلەسى جىلدىڭ ءساۋىر ايىندا قارعالى وزەنىندەگى سۋ جيناۋ قۇرىلىسى اياقتالادى. 2022 جىلى اقساي وزەنى مەن ەرمەنساي شاعىن اۋدانىندا وسىنداي قۇرىلىستار باستالادى.
2025 جىلدىڭ سوڭىنا قاراي الماتى تۇرعىندارىن اۋىز سۋمەن قامتاماسىز ەتۋ 100%-دى قۇرايدى.قالا ومىرىندە گاز ينفراقۇرىلىمى ماڭىزدى ءرول اتقارادى. قازىرگى كەزدە الماتىدا ۇيلەردىڭ 99،2%-ى گازبەن جابدىقتالعان.
سوت ارقىلى يەسىز ينجەنەرلىك جەلىلەردى انىقتاۋ جانە تانۋ جۇمىستارى جالعاسۋدا. سوت شەشىمدەرىنەن كەيىن جەلىلەر كوممۋنالدىق مەنشىككە قابىلدانىپ، كەيىننەن جاڭعىرتىلادى. بۇگىنگى تاڭدا جالپى ۇزىندىعى 168،2 كم بولاتىن 246 ينجەنەرلىك ينفراقۇرىلىم نىسانى انىقتالىپ، يەسىز دەپ تانىلدى.
بۇدان باسقا، اعىمداعى جىلى اكىمدىكتىڭ قاۋلىلارىمەن 2019 جىلعا دەيىن انىقتالعان وبەكتىلەر كوممۋنالدىق مەنشىككە قابىلداندى. ونىڭ ىشىندە 96،6 كم سۋمەن جابدىقتاۋ جەلىلەرى، 42،7 كم سۋ بۇرۋ جەلىلەرى بار.