«الماتى تراسساسى» اشىلدى

سەگىز جىل سالىنعان وسكەمەن – تالدىقورعان تاس جولى رەسمي تۇردە ىسكە قوسىلدى

حالىق اراسىندا «الماتى تراسساسى» دەپ تانىمال وسكەمەن – تالدىقورعان اۆتوجولىن جاساۋعا شامامەن سەگىز جىل ۋاقىت كەتتى دەپ حابارلايدى aqshamnews.kz 

ۇزاق مەرزىمدى قۇرىلىستىڭ باستى سەبەپتەرى – پاندەميا، قارجى مەن ماتەريالداردىڭ جەتىسپەۋشىلىگى. الايدا بۇگىنگى تاڭدا جول زاماناۋي تالاپتارعا ساي: ءتورت جولاقتى ماگيسترال جارىقتاندىرۋ جۇيەسىمەن، جول بەلگىلەرىمەن جانە ەكى دەڭگەيلى كولىك ايىرىعىمەن جابدىقتالعان.

«كەيبىر ۋچاسكەلەردە جۇمىستار 2017 جىلى باستالعان. باسقا ۋچاسكەلەر سول ۋاقىتتا جوبالانعان بولاتىن. پاندەميا سالدارىنان قۇرىلىس توقتاتىلدى، ال ودان كەيىنگى كەزەڭدە جوبا قۇنى ازداپ ءوستى. وسىعان بايلانىستى جوبانى تۇزەتۋگە تۋرا كەلدى»، – دەدى «قازاۆتوجول» باسشىسى دارحان يماناشيەۆ.

جوبانى قارجىلاندىرۋدى جۇڭگو بانكى جۇزەگە اسىردى، ال قۇرىلىس جۇمىستارىن قازاقستاندىق-تۇرىك كومپانياسى ورىندادى. جالپى، جولدى قايتا قۇرۋعا شامامەن 300 ميلليارد تەڭگە جۇمسالدى. سەگىز جىل ىشىندە جوبا قۇنى شامامەن 30 پايىزعا قىمباتتادى.

وسكەمەن – قالباتاۋ – تالدىقورعان تراسساسى جەتىسۋ، اباي جانە شىعىس قازاقستان وبلىستارىن بايلانىستىرادى. ۇزىندىعى – 768 شاقىرىم. بۇل اۆتوماگيسترال حالىقارالىق ترانزيتتىك تاسىمالداۋ ءۇشىن ماڭىزدى كولىك ءدالىزى بولىپ سانالادى.