الماتىدا جاڭا ەرەجەگە ساي باستاپقى كەزەڭدە زاڭسىز قۇرىلىستىڭ جولىن كەسۋگە بولادى
الماتى ءماسليحاتىنىڭ XXVI كەزەكتەن تىس سەسسياسىندا قۇرىلىس-مونتاج جۇمىستارىنىڭ كوتەرگىش جانە (نەمەسە) قورشاۋ قۇرىلىمدارىن سالۋ مەن قايتا قۇرۋعا قويىلاتىن تالاپتارعا سايكەستىگىن تەكسەرۋ ماقساتىندا قۇرىلىس نىساندارىنا كىرۋ ءتارتىبى بەكىتىلدى، دەپ حابارلايدى aqshamnews.kz
بۇل قۇقىقتىق اكت جوباسىن الماتى قالاسىنىڭ قالالىق قۇرىلىس باقىلاۋ باسقارماسى الماتى اكىمى ەربولات دوسايەۆتىڭ تاپسىرماسىمەن ازىرلەدى.
قازىرگى تاڭدا ساۋلەت-قۇرىلىس باقىلاۋ ورگاندارىنىڭ قۇرىلىس نىساندارىنا كەدەرگىسىز كىرۋ مۇمكىندىگى جوق ەكەنى بەلگىلى. ق ر كاسىپكەرلىك كودەكسىنە سايكەس رەسمي وتىنىشتەردىڭ نەگىزىندە عانا تەكسەرۋگە بولادى.
قۇرىلىس نىساندارىنا كىرۋدىڭ بەكىتىلگەن ءتارتىبى بويىنشا ينسپەكسيا جۇرگىزۋگە نەگىز رەتىندە رۇقسات قۇجاتتارى جوق قۇرىلىس-مونتاج جۇمىستارىنىڭ جۇرگىزىلۋى، بەكىتىلگەن جوبالىق-سمەتالىق قۇجاتتامادان اۋىتقۋ جانە قۇرىلىس-مونتاج جۇمىستارىنىڭ باستالعانى تۋرالى حابارلامانىڭ بولماۋى سەكىلدى فاكتىلەر قىزمەت ەتە الادى. وسىلايشا، بۇل ءتارتىپ باستاپقى كەزەڭىندە زاڭسىز قۇرىلىستىڭ جولىن كەسۋگە مۇمكىندىك بەرەدى.
بۇل رەتتە، تەكسەرۋ جۇرگىزۋ ءۇشىن نىساندا ءتيىستى تۇردە حابارلانعان مۇددەلى تۇلعانىڭ بولماۋى ينسپەكسيا جۇرگىزۋگە كەدەرگى بولىپ سانالمايدى. بۇل جوسپاردان تىس تەكسەرۋلەر جۇرگىزۋ تالاپتارىنان ەرەكشەلەنەدى.
ساۋلەت-قۇرىلىس باقىلاۋ جانە قاداعالاۋ ورگاندارى قازاقستان رەسپۋبليكاسىنىڭ كاسىپكەرلىك كودەكسىنە سايكەس جوسپاردان تىس تەكسەرۋلەر جۇرگىزۋدى جالعاستىرادى. الايدا ينسپەكسيا اياسىندا انىقتالعان بۇزۋشىلىقتار بولعان جاعدايدا جاڭا ءتارتىپ بۇزۋشىلىقتاردى جويۋ ءۇشىن اۋدان اكىمدىگىنىڭ حاتى نەگىزىندە جەدەل تەكسەرۋ جۇرگىزۋگە مۇمكىندىك بەرەدى.
ايتا كەتەيىك، قازىرگى ۋاقىتتا بۇل قۇقىقتىق اكت ادىلەت دەپارتامەنتىندە تىركەلۋدە.