ءۇش الماتىلىق ارنايى ۇيشىكتى پانالاعان.
سوڭعى ەكى اپتادا الماتىدا جاڭادان ءۇش قوسىمشا تاۋ ۇيشىگى ورناتىلدى. ەندى ولاردىڭ سانى 18. سوڭعى مالىمەتتەر بويىنشا، تەك سوڭعى 2 ايدا عانا وسى ۇيشىكتەردى تۋريستەردىڭ 10-نان استام توبى باسپانا رەتىندە پانالاعان، دەپ حابارلايدى Almaty-akshamy.kz.
تۋريستىك توپتان اجىراپ قالعان ءۇش الماتىلىق 25 جەلتوقساندا «كىشى الماتى اينالىمى» باعىتى بويىنشا اداسىپ قالادى. تاۋ جورىعىندا مەدەۋ — كيماساروۆ شاتقالى — فۋرمانوۆكا — پانوراما— باشۋتا — شىمبۇلاق — تالعار ۇلكەن اسۋى— شىمبۇلاق — مەدەۋ باعىتتارى قاراستىرىلعان.
ءوز كۇشتەرىن ەسكەرمەگەن ءارى ارنايى جابدىقتارسىز جانە ازىق-تۇلىك قورىنسىز ولار كىشى الماتى شاتقالىنداعى ارنايى تاۋلى ۇيشىكتى پانالايدى.
«ولار تۇسكى اسقا دەيىن توپپەن بىرگە شىعىپ، بەس ساعات ارالىعىندا توپتان مۇلدەم اجىراپ، اداسىپ كەتەدى. باقىتىمىزعا وراي، ولار كۇن باتقانعا دەيىن ارنايى ۇيشىكتى پانالاعان. ۇشەۋىندە شامدارى، جىلى كيىمدەرى بولعان جوق. ەگەر تاۋلى ۇيشىكتى پانالاماعاندا، ولار تۇندە قاتتى اداسىپ، ءۇسىپ قالۋلارى مۇمكىن ەدى»، - دەدى تاۋ قۇتقارۋشىسى نۇربول نۇرالين.
قۇتقارۋشىلار ۇيشىكتەن ساعات 21:00-دە حابار الادى، سودان كەيىن قۇرامىندا نۇربول نۇرالين بار قۇتقارۋشىلار توبى اداسقان تۋريستەرگە جىبەرىلەدى. تۇنگى ساعات 2-دە ولار كىشى الماتى شاتقالىنا جەتىپ، تۋريستەردىڭ جاعدايىن تەكسەرىپ، ولارعا ىستىق تاماق بەرەدى. تاڭەرتەڭ اداسقان توپ قالاعا جەتتى.
تاۋ ۇيشىكتەرىن ورناتۋ جوباسىنىڭ باسىنان بەرى 20-دان استام توپ تۋريستىك باسپانانى پايدالاندى. بۇگىندە الماتى تاۋلارىندا اسا ماڭىزدى باعىتتاردىڭ قيىلىسۋ نۇكتەلەرىندە 18 تاۋ ۇيشىگى بار.
«تۋريستىك ۇيشىكتە قونىپ شىققان سوڭ، ولاردىڭ وتە پايدالى ەكەنىنە كوز جەتكىزدىم. ۇيشىك مەن ءۇشىن قۇتقارۋشى بولدى، ويتكەنى مەن تىزەمنىڭ اۋىرسىنۋىن سەزىنىپ، كەرى قاراي جۇرە المادىم. ارنايى ۇيشىكتە تۇنەپ شىققان سوڭ، @visitalmatykz-كە العىس ايتقىم كەلەدى، ويتكەنى بۇل ۇيدە تاۋ تۋريستەرى ءۇشىن بارلىق قاجەتتى جاعدايلار جاسالعان: تجم-گە قوڭىراۋ شالۋ تۇيمەسى؛ ەلەكتر جارىعى جانە ۇيالى تەلەفوندى زاريادتاۋ قۇرىلعىسى؛ دايىندالعان وتىنى بار پەش؛ شكافتا كرۋجكا مەن كومپانيانىڭ لوگوتيپتەرى بار ءۇش كورپە بولدى.العاشقى مەديسينالىق كومەك قوبديشاسى مەن ءۇش كەرەۋەت بار، ۇيشىك الىستان بىردەن كورىنەدى، قىزعىلت سارى تۇسكە يە»، - دەپ جازدى قۇتقارىلعان تۋريست سالتانات الەۋمەتتىك جەلىدەگى پاراقشاسىندا.
بۇگىندە ىلە الاتاۋ تاۋلارىندا اۋا رايىنىڭ قولايسىزدىعى نەمەسە كۇردەلى جورىقتار كەزىندە تۋريستەر پانالايتىن جاڭادان 3 قوسىمشا تاۋ ۇيشىكتەرى ورناتىلدى. ولار ۇلكەن الماتى شاتقالىنداعى «تەررا» الاڭىندا، سونداي-اق كىشى الماتى شاتقالىنداعى بۋكرەيەۆ پەن قۇمبەل شىڭدارىندا ورنالاسقان.
ۇيشىكتەر قۇتقارۋشىلارمەن شۇعىل بايلانىس جۇيەسىمەن جابدىقتالعان، ولاردا العاشقى كومەك اپاتتىق جيىنتىعى - العاشقى مەديسينالىق كومەك قوبديشاسى، ءموبيلدى قۇرىلعىلاردى زاريادتاۋ ستانسياسى، جىلى كورپە جانە بۇزىلمايتىن ازىق-تۇلىك جيىنتىعى ( سىرىڭكە، تەز دايىندالاتىن كەسپە، كرەكەر، بانكاداعى بوتقا، وتىن) بار. ارنايى ۇيشىكتەر الىستان كوزگە بىردەن شالىناتىن اشىق قىزعىلت سارى تۇسكە بويالعان.
