وتباسىنىڭ سيفرلىق كارتاسى ىسكە قوسىلدى

وندا 6،3 ملن وتباسى تۋرالى اقپارات جيناقتالعان.

ءقازىر جۇيەدە جاردەماقىلار مەن الەۋمەتتىك تولەمدەردىڭ 9 ءتۇرى بويىنشا قىزمەتتەر الۋ مۇمكىندىگى بەرىلگەن، دەپ حابارلايدى Almaty-akshamy.kz

2023 جىلعى 1 قاڭتاردان باستاپ قازاقستاندا مەملەكەتتىك قولداۋ شارالارىن پرواكتيۆتى تاعايىنداۋ ءۇشىن جۇمىس رەجيمىندە وتباسىنىڭ سيفرلىق كارتاسى ىسكە قوسىلدى.

ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، وسك «Smart Data Ukimet» اناليتيكالىق جۇيەسىمەن ينتەگراسيالانعان. ول جۇيەدە مەملەكەتتىك ورگانداردىڭ بارلىق دەرەكقورى جيناقتالعان. وندا تابىس دەڭگەيى، جىلجىمالى جانە جىلجىمايتىن مۇلىكتىڭ بولۋى، وتباسى قۇرامى، كرەديتتىڭ بولۋى جانە ت.ب. سياقتى ءارتۇرلى اقپارات قامتىلعان.

بۇگىندە مەملەكەتتىك ورگانداردىڭ اقپاراتتىق جۇيەلەرىنىڭ دەرەكتەرى نەگىزىندە وسك-دا قازاقستاننىڭ 19،5 ملن ازاماتى نەمەسە 6،3 ملن وتباسى تۋرالى اقپارات جيناقتالعان.

قولدا بار دەرەكتەر نەگىزىندە ەكونوميكالىق، الەۋمەتتىك، تۇرعىن ءۇي جاعدايلارى، دەنساۋلىق پەن ءبىلىم بويىنشا وتباسىنىڭ ءال-اۋقات دەڭگەيىن باعالاۋعا جانە قاداعالاۋعا مۇمكىندىك بەرەتىن تالداۋلار جۇرگىزىلەدى. ال الەۋمەتتىك تاۋەكەل تۋىنداعان جاعدايدا وسك جاردەماقى نەمەسە الەۋمەتتىك تولەمدى پرواكتيۆتى تۇردە الۋعا مۇمكىندىك بەرەدى. ول ءۇشىن وسك ارقىلى الەۋەتتى جاردەماقى الۋشىعا SMS-حابارلاما جىبەرىلەدى جانە وڭ جاۋاپ بولعان جاعدايدا وعان ءتيىستى تولەم تاعايىندالىپ، ءتيىستى قاراجات بانكتىك شوتىنا اۋدارىلادى.

ەسكە سالا كەتسەك، وسك 2022 جىلدىڭ 1 قىركۇيەگىنەن باستاپ پيلوتتىق رەجيمدە ىسكە قوسىلدى. اپروباسيا كەزەڭىندە مەملەكەتتىك قىزمەت كورسەتۋگە كەلىسىم الۋ ءۇشىن بارلىعى 56،9 مىڭ SMS-حابارلاما جىبەرىلىپ، جاۋاپ بەرگەن 12،9 مىڭ ازاماتقا قولداۋ شارالارى كورسەتىلدى.

ءقازىر وسك-دا جاردەماقىلار مەن الەۋمەتتىك تولەمدەردىڭ 9 ءتۇرى بويىنشا قىزمەتتەر الۋ مۇمكىندىگى بەرىلگەن:

جۇكتىلىككە جانە بوسانۋعا بايلانىستى تابىسىنان ايىرىلعان جاعدايدا الەۋمەتتىك تولەمدەر؛

بالا كۇتىمىنە بايلانىستى تابىسىنان ايىرىلعان جاعدايدا الەۋمەتتىك تولەمدەر؛

جۇمىسىنان ايىرىلعان جاعدايدا الەۋمەتتىك تولەمدەر؛

اسىراۋشىسىنان ايىرىلعان جاعدايدا الەۋمەتتىك تولەمدەر؛

مۇگەدەكتىگى بار بالا تاربيەلەپ وتىرعان اتا-اناعا (قامقورشىعا) بەرىلەتىن جاردەماقىلار، مۇگەدەكتىگى بويىنشا جاردەماقىلار؛

كوپبالالى وتباسىلارعا بەرىلەتىن جاردەماقىلار؛

«كۇمىس القا» نەمەسە «التىن القا» القالارىمەن ماراپاتتالعان كوپبالالى انالارعا بەرىلەتىن جاردەماقىلار؛

اتاۋلى الەۋمەتتىك كومەك.

سونداي-اق ازاماتتارعا وسك ارقىلى زەينەتاقى تولەمدەرىن الۋ مۇمكىندىگى تۋرالى اۆتوماتتى حابارلاما جىبەرىلەدى.

2023 جىلى الەۋمەتتىك قورعاۋ سالاسىنداعى قىزمەتتەر تىزبەسى كەڭەيتىلەدى. 2024 جىلعى 1 قاڭتاردان باستاپ دەنساۋلىق ساقتاۋ جانە ءبىلىم بەرۋ سالالارىنداعى مەملەكەتتىك كەپىلدىكتەر ەنگىزىلەدى. 2025 جىلدان باستاپ جوعارىدا اتالعان 3 سالادا مەملەكەتتىك كەپىلدىكتەردىڭ بارلىق ءتۇرى قامتىلماق.