الماتى قالاسى مادەنيەت باسقارماسىنا قاراستى قازاق مەملەكەتتىك سيركىنىڭ جاس تالانتتى ونەرپازى، سيرك اۋلەتىنىڭ جالعاستىرۋشىسى، ج.ەلەبەكوۆ اتىنداعى رەسك ستۋدەنتى، 16 جاستاعى ءالي سالاۆاتوۆ رەسەيدىڭ تۋلا قالاسىندا وتكەن «نا يازىكە ميرا» V حالىقارالىق بالالار مەن جاستار سيرك ونەرى فەستيۆالىندە قولا جۇلدە الدى.
اتالعان فەستيۆال الەمنىڭ تۇكپىر-تۇكپىرىنەن جينالعان جاس ارتيستەردىڭ شەبەرلىگىن كورسەتەتىن ماڭىزدى حالىقارالىق الاڭ. ءىس-شاراعا جونگلەرلەر، اكروباتتار، سايقىمازاقتار، ەكۆيليبريستەر جانە سيرك ونەرىنىڭ باسقا دا باعىتتارى بويىنشا كوپتەگەن ەلدەن دارىندى قاتىسۋشىلار جينالدى. بيىلعى فەستيۆال مانەجدە 200-دەن استام جاس ونەرپازدى بىرىكتىردى.
ءاليدىڭ «ەدەنگە سوقپالى دوپتارمەن جونگلورلىك ونەر» اتتى كوركەم ءنومىرى قازىلار القاسى مەن كورەرمەندەردى ەرەكشە شەبەرلىگىمەن، ورىنداۋ دالدىگىمەن جانە جارقىن ەنەرگياسىمەن باۋراپ الدى. فەستيۆالدەگى جوعارى باسەكەلەستىك دەڭگەيى بۇل جەتىستىكتىڭ قۇندىلىعىن ودان ءارى ارتتىرىپ، جاس ءارتيستىڭ تالانتىن ايقىن كورسەتتى.
«مەن ءۇشىن بۇل جەڭىس – جاڭا مۇمكىندىكتەرگە جول اشقان ەرەكشە ءسات. قولداعان ۇستازدارىما، ۇيىمداستىرۋشىلارعا جانە جانكۇيەرلەرگە شىن جۇرەكتەن العىس ايتامىن. الداعى ۋاقىتتا بۇدان دا بيىك اسۋلاردى باعىندىرۋعا ۇمتىلامىن»، - دەدى جاس ارتيست.