الماتىدا قۋىرشاق تەاترلارىنىڭ VI حالىقارالىق «ورتەكە» فەستيۆالى ءوز مارەسىنە جەتتى.
بايقاۋعا گرۋزيا، تۇركيا، كورەيا، وزبەكستان جانە قىرعىزستاننىڭ قۋىرشاق تەاترلارى قاتىسىپ، كورەرمەن نازارىنا بالالار مەن ەرەسەكتەرگە ارنالعان ۇزدىك قويىلىمدارىن ۇسىندى. اتالمىش بايقاۋ رەسپۋبليكالىق مەملەكەتتىك اكادەميالىق كورەي مۋزىكالىق كومەديا تەاترىندا، مەملەكەتتىك قۋىرشاق تەاترىندا جانە توتالنىي تەاتر ساحنالارىندا ءوتتى.
«ەرتەگىلەر الەمىنە جەتەلەگەن قۋىرشاقتار فەستيۆالى جاقسى ءوتتى. سپەكتاكلدەر كوپ بولماسا دا ءتۇرى، فورماسى، مازمۇنى جاعىنان ءارتۇرلى بولىپ كەلدى. تەك بالالار ەمەس، ەرەسەك ادامدار دا فيلوسوفياعا، وي-تولعامدارعا جەتەلەيتىن قويىلىمداردى تاماشالادىق. ءداستۇرلى، فولكلورلىق، جارمەڭكەلىك سپەكتاكلدەر بولدى. سپەكتاكلدەردىڭ كوركەمدىك دەڭگەيى جوعارى. كاسىبي تۇرعىدان ءوز پىكىرىمىزدى دە ايتىپ وتىردىق. قاراپ وتىرساق، قاي تەاتر بولماسىن، بارلىعى دا ءبىر ءۇيدىڭ بالاسىنداي ءتاتۋ-تاتتى بەيبىت عۇمىر كەشىپ جاتقانى قۋانتادى. قازىرگى ۋاقىتتا 7 مەملەكەتتىك قۋىرشاق تەاترى بار. ەلىمىزدىڭ دراما تەاترلارى قۋىرشاق ونەرىنە قىزىعۋشىلىق تانىتىپ، قۋىرشاق ترۋپپالارىن اشىپ جاتىر. ءار وڭىردە قۋىرشاق ونەرى وركەندەپ، دامىپ كەلە جاتقانى ءبىز ءۇشىن ۇلكەن قۋانىش»، – دەدى قازىلار القاسىنىڭ ءتوراعاسى انار ەركەباي.
فەستيۆالدىڭ قازىلار القاسىنىڭ قاتارىندا قازاقستان، كورەيا، گرۋزيا جانە تۇركيانىڭ تەاتر قايراتكەرلەرى بولدى. ولار اكتەرلارعا ءادىل باعالارىن بەردى.
قۋىرشاق فەستيۆالىنىڭ بيىلعى جەڭىمپازدارىنا كەلسەك، «ورتەكە» VI حالىقارالىق قۋىرشاق تەاترلارى فەستيۆالىنىڭ «ەڭ ۇزدىك قويىلىم» نوميناسياسى بويىنشا ياكوب گوگەباشۆيلي اتىنداعى كۋتايسي مەملەكەتتىك كاسىبي قۋىرشاق تەاترىنىڭ «گادكيي ۋتەنوك» سپەكتاكلى جەڭىمپاز اتاندى. «ەڭ ۇزدىك اكتەرلىك شەبەرلىك» اتالىمى بويىنشا ە.لوكشينانىڭ «مەن ءبىر جۇمباق اداممىن. اباي» قويىلىمى ءۇشىن الماتى قالاسىنىڭ مەملەكەتتىك قۋىرشاق تەاترى ۇزدىك دەپ تانىلدى. «FFWANG» تەاترىنىڭ اكتەرى كۆان سو ونگ «ەڭ ۇزدىك قۋىرشاق جۇرگىزۋشسى» اتاندى. ال «ەڭ ۇزدىك سەنوگرافيا» ماراپاتىنا توتالنىي تەاتر ۇجىمىنىڭ «ديۋيموۆوچكا» تۋىندىسى يە بولدى. «ەڭ ۇزدىك قۋىرشاق سۋرەتشىسى» «اق كەمە» (ش. ايتماتوۆ) قويىلىمى ءۇشىن «الاقاي» اقتوبە وبلىستىق قۋىرشاق تەاترىنىڭ سۋرەتشىسى ءاسيا قۇرماناليناعا بۇيىردى. «ورتەكە» فەستيۆالى ۇيىمداستىرۋ كوميتەتىنىڭ ارنايى جۇلدەسىمەن «قوزى كورپەش – بايان سۇلۋ» (ع.مۇسىرەپوۆ) قويىلىمى ءۇشىن ماڭعىستاۋ وبلىستىق قۋىرشاق تەاترى ماراپاتتالدى.