راپۋنسەل سيندرومى بار ناۋقاسقا ەلىمىزدە وپەراسيا جاسالدى

قىز بالالار راپۋنسەل سيندرومىنا ءجيى ۇشىرايدى ەكەن.

Astana news telegram ارناسىنىڭ جازۋىنشا، ەلوردا دارىگەرلەرى ناۋقاستىڭ اسقازانىنان "شاش ىسىگىن" الدى، دەپ حابارلايدى Almaty-akshamy.kz

ءىش اۋرۋى مەن جۇرەك اينۋىنا شاعىمدانىپ كەلگەن استانا قالاسىنىڭ 15 جاسار تۇرعىنىن تەكسەرۋ كەزىندە اسقازاننىڭ تريحوبەزوارى انىقتالىپ، وپەراسياعا جىبەرىلگەن.

بۇل سيندروم ناۋقاس شاش جۇتىپ قويعان كەزدە قويىلادى. سالدارىنان شاش اسقازان-ىشەك جولىندا جينالىپ قالادى.

دارىگەرلەردىڭ ايتۋىنشا، بۇل اۋرۋ وتە سيرەك كەزدەسەدى. اسقازاندا شاتاسىپ جينالعان شاشتىڭ كوپ مولشەرى تريحوبەزوار اۋرۋىنىڭ نەمەسە "شاش ىسىگىنىڭ" پايدا بولۋىنا اكەپ سوعادى،ول اسقازاندى بىرتىندەپ "بىتەپ"، جۇمىسىنىڭ تۇبەگەيلى بۇزىلۋىنا اكەلەدى. ءپىشىنى بويىنشا مۇنداي ىسىك اسقازان پىشىنىنە ءدال سايكەس كەلەدى.

"عىلىمي مالىمەتتەرگە سايكەس، راپۋنسەل سيندرومى بار پاسيەنتتەردىڭ 70 پايىزى - 20 جاسقا تولماعان قىزدار"، - دەيدى حيرۋرگ ازامات ورازالينوۆ.

ونىڭ ايتۋىنشا، قىز بالالار ۇلدارعا قاراعاندا راپۋنسەل سيندرومىنا ءجيى ۇشىرايدى. ايەلدەردىڭ شاشى ادەتتە ەر ادامعا قاراعاندا ۇزىنىراق، سوندىقتان اسقازاننىڭ شىرىشتى قاباتىندا قالىپ قويۋ ىقتيمالدىعى جوعارى. بالا شاشتى جۇتقان كەزدە ىسىك كولەمى ۇلعايادى جانە ول سىڭىرىلمەيتىن اۋقىمدى ماسساعا جينالادى.

تريحوفاگيا جانە پيكاسيزم (تابەتتىڭ بۇزىلۋى جانە جەۋگە جارامسىز زاتتاردى جەۋگە دەگەن قالاۋ) دەنەسىندە تەمىر جەتىسپەيتىن ادامداردا كەزدەسەدى. عىلىمداعى زەرتتەۋگە سۇيەنسەك، پاسيەنت قۇرامىندا تەمىر بار پرەپاراتتاردى قابىلداعاننان نەمەسە سەلياك اۋرۋىن ەمدەگەننەن سوڭ عانا شاشتىڭ ءتۇسۋى جانە ونى جۇتۋ توقتاعان.