مەرەكەلىك شاراعا 5 مىڭنان استام بالا قاتىستى، دەپ حابارلايدى aqshamnews.kz
الماتىدا حالىقارالىق بالالاردى قورعاۋ كۇنىنە ارنالعان «BALA FEST. JARYQ SKILLFEST» فەستيۆالى ءوتىپ جاتىر.
1 ماۋسىم – حالىقارالىق بالالاردى قورعاۋ كۇنىندە الماتى شىن مانىندە بالالىق شاقتىڭ، قۋات پەن شابىتتىڭ ورتاسىنا اينالدى. مەرەكەگە وراي ۇيىمداستىرىلعان BALA FEST. JARYQ SKILL FEST فەستيۆالءى ارقىلى بۇلدىرشىندەرجارقىن، باتىل، مەيىرىمدى ءارى كرەاتيۆتى قالانى كورە الدى. ءىس-شارا ءاليا مولداعۇلوۆا مەن مانشۇك مامەتوۆا اتىنداعى ساياباقتا وتۋدە.
الماتى قالاسىنىڭ اكىمى دارحان ساتىبالدى فەستيۆالگە ارنايى كەلىپ، بۇلدىرشىندەرمەن جۇزدەستى، ءارى جاس ۇرپاققا ارنالعان يگى باستامالارعا قولداۋ ءبىلدىردى. فەستيۆال JARYQ دەپ اتالاتىن بەس تاقىرىپتىق بەكەت فورماتىندا ۇيىمداستىرىلعان. ونداعى ءاربىر بەكەت بالا دامۋىنىڭ ماڭىزدى قىرلارىن بەينەلەيدى. ايتالىق، Jastar – تەحنولوگيا مەن يننوۆاسيانى، Arman – ارمان مەن قيال الەمىن، Rukh – رۋحانيات پەن تاريحتى، Yntalyq – ونەر مەن شىعارماشىلىقتى، Qabilet – ماماندىقتارمەن تانىسۋ جانە كاسىبي باعىت-باعداردى بەينەلەگەن. .
فەستيۆالدىڭ باستى ماقساتى – بالالارعا قىزىقتى ءارى پايدالى edutainment (ويىن ارقىلى وقىتۋ) ءادىسىن ەنگىزۋ. بۇل ءادىس بالالارعا جاڭا ءبىلىمدى الا وتىرىپ ونى قۋانىش پەن ومىرلىك تاجىريبەگە اينالدىرا الاتىن ءتيىمدى ءتاسىل سانالادى. اسىرەسە Qabilet بەكەتى ەرەكشە اسەر قالدىردى. بۇل – جۇمىسشى ماماندىقتار جىلى اياسىندا ۇيىمداستىرىلعان الاڭ. مۇندا بالالار ءتۇرلى كاسىپپەن تانىسىپ قانا قويماي، وزدەرى دە تاجىريبە جاساپ، قول ەڭبەگىمەن اينالىسىپ كوردى. وسىنداي باستامالار ارقىلى ەڭبەككە دەگەن قۇرمەت پەن كەز كەلگەن كاسىپتىڭ ءقادىرىن بالا جاسىنان بويعا سىڭىرۋگە جول اشىلادى.
«ءبىز سانالى دا تالانتتى ءارى ءار ىسىنە جاۋاپتى جاڭا ۇرپاقتى قالىپتاستىراتىن باستامالاردى جالعاستى قولدايمىز. الماتى – ءار بالا وزىنە سەنەتىن جانە ارمانىنا نىق قاداممەن جەتەتىن قالا. ءبىز جاي عانا قولايلى ورتا ەمەس، ءاربىر بالا ءوز الەۋەتىن اشىپ، ارمانىنىڭ ماڭىزدى ەكەنىن جانە مۇمكىندىكتەردىڭ بار ەكەنىن تۇسىنەتىن بولاشاقتى قالىپتاستىرىپ جاتىرمىز دەپ سانايمىن»، – دەدى فەستيۆالگە قاتىسقان دارحان ساتىبالدى.
قالاداعى شىعارماشىلىق ورتالىقتارىنان، وقۋشىلار سارايى مەن مۋزىكا مەكتەپتەرىنەن كەلگەن بالالار دايىنداعان شەبەرلىك ساعاتتارى مەن پەرفومانستارى فەستيۆالگە جاڭا بوياۋ قوستى. بالالاردىڭ ءوز قولىمەن جاساعان ونەرى مەن كرەاتيۆىمىڭداعان كورەرمەندى شابىتتاندىردى.
الماتى قالاسىندا قوسىمشا ءبىلىم بەرۋگە ەرەكشە ءمان بەرىلۋدە. 2023–2029 جىلدارعا ارنالعان جول كارتاسىنا سايكەس، بۇل سالاعا بولىنەتىن قارجى جىل سايىن ءوسىپ كەلەدى. بۇگىندە قالاداعى 216 مەكتەپتە 309 مىڭنان استام بالا ءبىلىم الۋدا، ولاردىڭ 224 مىڭنان استامى قوسىمشا بىلىممەن قامتىلعان. بۇل باعىتتا 19 مەملەكەتتىك ۇيىم، 122 جەكەمەنشىك ورتالىق (مەملەكەتتىك تاپسىرىس بويىنشا) جانە مەكتەپ جانىنداعى ۇيىرمەلەر جۇمىس ىستەيدى.
2025 جىلى مەملەكەتتىك ۇيىمداردا 8،6 ميلليارد تەڭگە (2024 جىلى – 6،1 ملرد)، ال جەكەمەنشىك ورتالىقتاردا 3،1 ميلليارد تەڭگە (2024 ج. – 2،3 ملرد) ءبولىنۋى كوزدەلگەن. بۇل قاراجات عىلىمنان باستاپ ەكولوگيا، ونەر، سپورت جانە تىلگە دەيىنگى جەتى باعىتتى قامتيتىن 11 مىڭنان استام بالانىقامتۋعا مۇمكىندىك بەرەدى.