الماتى قالاسى بويىنشا قىلمىستىق-اتقارۋ جۇيەسى دەپارتامەنتىنە قاراستى №11 مەكەمەدە شاعىن فۋتبولدان جولداستىق كەزدەسۋ ءوتتى.
اتالعان مەكەمەدە، ناقتىراق ايتساق، بالالار كولونياسىندا سپورت دەسە ىشكەن اسىن جەرگە قوياتىن ءجاسوسپىرىم وتە كوپ. بۇرىن تەڭبىل دوپ سايىسى تۇزەۋ مەكەمەسىندەگى بالالار مەن قالاداعى كوللەدج ستۋدەنتتەرىنەن قۇرالعان كوماندالار اراسىندا ۇيىمداستىرىلاتىن.
بۇل جولى جاسىل الاڭعا جازاسىن وتەپ جاتقان جاسوسپىرىمدەرمەن بىرگە، الماتى ورتالىق مەشىتىنىڭ، «ابۋ-باكىر» جانە «يسميحان» مەشىتتەرىنىڭ يمامدارىنان جاساقتالعان كوماندا شىقتى. №11 مەكەمە كومانداسى مەن «مەشىت يمامدارىنىڭ» فۋتبول كومانداسى اراسىندا ويىن تارتىستى دا قىزىقتى ءوتتى. ەسەپ – 10:6. تۇزەۋ مەكەمەسىنىڭ تاربيەلەنۋشىلەرىنىڭ توبى جەڭىسكە جەتتى. جەڭىمپاز بالالارعا الماتى قالاسىنىڭ باس يمامى وسپان ءدادىل ۇلى باستاعان يمامدار سپورتتىق اياق كيىمدەر، تەڭبىل دوپتار تارتۋ ەتتى.
– مۇنداي سپورتتىق ءىس-شارانىڭ ماقساتى – جاسوسپىرىمدەردىڭ دەنساۋلىعىن نىعايتۋعا دانەكەر بولۋ، ولارعا سالاۋاتتى ءومىر سالتىنىڭ پايداسىن ناسيحاتتاۋ جانە سىرتقى ورتامەن بايلانىسىن ءۇزىپ الماۋعا جاعداي جاساۋ، – دەيدى تاربيە ءبولىمىنىڭ باستىعى ادىلەت پودپولكوۆنيگى الما بازىلبايەۆا.