الماتىدا جىلۋ جەلىلەرىن قايتا جاڭعىرتۋ سەبەبىنەن ەكى كوشەمەن قوزعالىس شەكتەلەدى، - دەپ حابارلايدى aqshamnews.kz ءتىلشىسى.
الماتىدا الداعى جىلىتۋ ماۋسىمىنا دايىندىق اياسىندا ءوز نورماتيۆ مەرزىمىن وتەپ بولعان جىلۋ جەلىلەرىن اۋىستىرۋ جۇمىستارى جۇرگىزىلىپ جاتىر. سوعان بايلانىستى قالانىڭ المالى اۋدانىندا كوشەلەردىڭ ەكى ۋچاسكەسىندە اۆتوكولىكتەر قوزعالىسى ۋاقىتشا شەكتەلەدى.
3 ماۋسىمنان باستاپ 6 شىلدەگە دەيىن الماتىنىڭ المالى اۋدانىندا اۆتوكولىكتەر قوزعالىسى شەكتەلەدى: ايتييەۆ كوشەسىمەن بوگەنباي باتىر كوشەسىنەن باستاپ تولە بي كوشەسىنە دەيىن (ەكى باعىتتا)؛ قازىبەك بي كوشەسىمەن شوكين كوشەسىنەن باستاپ يسايەۆ كوشەسىنە دەيىن (ەكى باعىتتا).
ۋاقىتشا شەكتەۋلەر كورسەتىلگەن كوشە سەگمەنتتەرىنىڭ جۇرگىن بولىگىنىڭ استىمەن وتەتىن ماگيسترالدىق قۇبىرجولداردى جاڭعىرتۋ بويىنشا جوسپارلى جۇمىستاردىڭ قاۋىپسىزدىگىن قامتاماسىز ەتۋ ءۇشىن ەنگىزىلەدى.
جالپى، بيىل بۇل وبەكتىلەردە 1978-1989 جىلدارى پايدالانۋعا ەنگىزىلگەن، جالپى ۇزاقتىعى 1 كيلومەتردى قۇرايتىن جىلۋمەن جابدىقتاۋ جەلىلەرىن اۋىستىرۋ جوسپارلانىپ وتىر. بۇل 13 كوپپاتەرلى ءۇيدىڭ تۇرعىندارىن قىس مەزگىلىندە تۇراقتى جىلۋمەن جابدىقتاۋدى قامتاماسىز ەتۋگە مۇمكىندىك بەرەدى.
بيىل قالا بويىنشا 39 كم جىلۋ تراسساسىن جاڭعىرتۋ جوسپارلانعان. بۇل توزۋ دەڭگەيىن 54% دەيىن ازايتۋعا مۇمكىندىك بەرەدى.
ەسكەرتەمىز، قوزعالىستاردى شەكتەۋگە قاتىستى بارلىق اقپارات Almaty.kz سايتىندا، @AlmatyJoly Telegram-ارناسىندا، اۋداندىق اكىمدىكتەر مەن باسقارمالاردىڭ الەۋمەتتىك جەلىلەرىندە، سونداي-اق "2GIS" جانە "ياندەكس كارتالار" سەرۆيستەرىندە ورنالاستىرىلعان.