«قازاقستاندا شەگىرتكەدەن چيپسى قاشان جاسالادى؟» – دەگەن جۋرناليستكە ۇلتتىق ەكونوميكا ءمينيسترى وسىلاي جاۋاپ بەردى.
جۋرناليستەر مينيسترگە وتكەن جىلى شەگىرتكە قاپتاعان كەزدە ايتقان ءسوزىن ەسكە سالدى. سول كەزدە سەرىك جۇمانعارين شەگىرتكەگە قاتىستى بۇل – كەيبىر ەلدەردە تاعام رەتىندە قولدانىلاتىن حالال ءونىم دەپ مالىمدەگەن بولاتىن. وسىعان وراي جۋرناليستەردىڭ ءبىرى: «قازاقستاندا شەگىرتكەدەن چيپسى قاشان جاسالادى؟» – دەپ سۇرادى. وسى سۇراقتان كەيىن بىرنەشە مينۋتقا سوزىلعان پىكىرتالاس باستالىپ كەتتى. جۇمانعارين شەگىرتكەنى جەۋگە ەشقاشان ۇگىتتەمەگەنىن ايتتى.
– مەن قاشان شەگىرتكەدەن چيپسى جاسايىق دەپ ۇسىنىس ايتتىم؟ نەنى ويدان شىعارىپ وتىرسىزدار؟ مەن ول شەگىرتكەنى جەۋ كەرەك دەپ ايتقان جوقپىن! قايتا-قايتا نەگە بۇرمالاپ ايتىپ وتىرسىزدار؟ مەن تەك ونىڭ حالال ءونىم ەكەنىن ايتتىم. بۇل مالىمەتتى قازاقستان مۇسىلماندارى ءدىني باسقارماسى دا راستادى. ءبىراق مەن ونى جەۋ كەرەك دەدىم بە؟ جەيمىن دەسەڭدەر – وزدەرىڭ بىلىڭدەر، – دەپ جاۋاپ بەردى مينيستر.