بۇل جايىندا ءۇش ەل كەلىسىمگە كەلدى، دەپ حابارلايدى aqshamnews.kz سۋ رەسۋرستارى جانە يرريگاسيا مينيسترلىگىنە سىلتەمە جاساپ.
قازاقستاننىڭ سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ، سونداي-اق تاجىكستان مەن وزبەكستاننىڭ سۋ ۆەدومستۆولارىنىڭ باسشىلارى 2025 جىلدىڭ ماۋسىمىنان تامىزىنا دەيىن "باحري توچيك" سۋ قويماسىن بىرلەسىپ پايدالانۋ جونىندەگى حاتتاماعا قول قويدى.
"ءبىز ءۇشىن ەڭ ماڭىزدى باعىتتاردىڭ ءبىرى – ءۇش ەل اراسىنداعى ىنتىماقتاستىقتى نىعايتۋ. قازاقستان سۋ رەسۋرستارىن باسقارۋ بويىنشا بىرلەسكەن جوبالاردى جۇزەگە اسىرۋعا، سونداي-اق حالىقارالىق سۋ قۇقىعى قاعيداتتارىن ىلگەرىلەتۋگە ۇمتىلادى. سۋ – جاي عانا تابيعي رەسۋرس ەمەس، ول – تۇراقتى دامۋ مەن وڭىرلىك تۇراقتىلىقتىڭ قۇرالى. ءبىز تەك ىنتىماقتاستىق ارقىلى عانا كليماتتىق سىن-قاتەرلەرگە ءتيىمدى قارسى تۇرا الامىز"، – دەدى سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ.
ۆەگەتاسيالىق كەزەڭنىڭ ەڭ قىزعان ۋاقىتىندا قازاقستانعا 491 ملن تەكشە مەتر سۋ جىبەرىلەدى دەپ كۇتىلىپ وتىر. قۇجاتتا سۋ قويماسىنىڭ جۇمىس كەستەسى كورسەتىلگەن. ول ءۇش ەل اراسىنداعى سۋدى ءتيىمدى ءارى تەڭدەي بولۋگە باعىتتالعان. مينيسترلەردىڭ كەزدەسۋى مەن حاتتاماعا قول قويۋ ءراسىمى دۋشانبەدە، مۇزدىقتاردى قورعاۋ جونىندەگى حالىقارالىق كونفەرەنسيا اياسىندا ءوتتى.