قۇرباندىققا شالىناتىن مالدىڭ تۇرلەرى مەن جاسىنا قاتىستى تالاپتار بار. قۇرباندىققا قوي، سيىر، ەشكى، تۇيە عانا شالىنادى. قوي مەن ەشكىنىڭ جاسى 1 جاستان، سيىر 2 جاستان، تۇيە 5 جاستان اسۋى ءتيىس. قوي – بازارداعى ەڭ ەتتى ۇساق مالداردىڭ ءبىرى. ونىڭ سالماعى شامامەن 30 كەلىگە جۋىقتايدى. نۇر كز سايتىنىڭ جازۋىنشا، قوي باعاسى 70 مىڭ تەڭگەدەن اسادى.
"باعا كوتەرىلەدى. قۇلاعى، باسى ءبۇتىن، جاسىنا تولعان مال. ەشقانداي ۋايىمسىز قۇربان شالۋعا جارامدى. باعاسى 80-85 مىڭ تەڭگە تۇرادى. توقتىلاردىڭ باعاسى 50-55، 60-65 تەڭگەنىڭ اراسىندا ساتىلىپ جاتىر"، – دەدى ساتۋشى مۇستافا مازاموۆ.
"مال سويعاندا قويدىڭ دەنى ساۋ بولۋى كەرەك، كوزى سوقىر، اياعى اقساق، قۇلاعى كەسىلمەۋى كەرەك. ءار باستى 3 مىڭ، ءىرى قارانى 7-8 مىڭ تەڭگەگە سويىلادى"، – دەدى قاساپشى الىمبەك ساپايەۆ.
ءقازىردىڭ وزىندە بازارلاردا قىزۋ دايىندىق بايقالادى. قۇربان شالۋعا نيەتتەنگەن جۇرت مال تاڭداپ، تاپسىرىس بەرىپ جاتىر.
"استانا قالاسىنداعى مال بازارىنان قوي الىپ، قۇرباندىققا شالىپ، ساداقا بەرىپ جاتىرمىز. باعالارى كوڭىلىمىزدەن شىقتى"، – دەدى قالا تۇرعىنى ينديرا سەيىتجان قىزى.
ايتا كەتەيىك، بىلتىر 40 مىڭ 778 مال قۇرباندىققا شالىنىپ، 131 ەت قابىلداۋ پۋنكتىنە جينالعان ەت 137 مىڭعا جۋىق وتباسىعا جەتكىزىلگەن. ال بيىل ەلىمىز بويىنشا 60 ورىندا قۇربان شالۋ ءراسىمى وتەدى.