الماتى قالاسىنىڭ قاج دەپارتامەنتىنە قاراستى №11 مەكەمەدە كامەلەتكە تولماعان سوتتالعاندار 1 ماۋسىم — بالالاردى قورعاۋ كۇنىن اسىعا كۇتەدى. سەبەبى ءدال وسى كۇنى تۇزەۋ مەكەمەسىندەگى جاسوسپىرىمدەر اتا-اناسىمەن، تۋعان-تۋىسىمەن كەزدەسەدى.
بيىل دا جىلداعى ءداستۇر بويىنشا مەكەمە قىزمەتكەرلەرى بالالار مەرەكەسىندە “اشىق ەسىك” كۇنىن ۇيىمداستىردى. قىلمىس جاساعان بالالار جازاسىن وتەيتىن كولونيادا قازىرگى كۇنى 70 بالا بار. سونىڭ ىشىندە اسا اۋىر قىلمىس جاساعاندارى – 31، اۋىر قىلمىس جاساعاندارى – 39.
اتا-انا مەن بالانىڭ قاۋىشۋ مەرەكەسىن قاج دەپارتامەنتى باستىعىنىڭ ورىنباسارى ادىلەت پولكوۆنيگى ازامات امانجولوۆ ىزگى تىلەگىمەن اشتى. سونىمەن قاتار الماتى قالاسى بويىنشا قاج دەپارتامەنتىنىڭ ارداگەرلەر كەڭەسىنىڭ ءتوراعاسى ەرعالي ساعالبايەۆ جانە ق ر ادام قۇقىقتارى جونىندەگى ۋاكىلدىڭ الماتى قالاسى بويىنشا وكىلى قازبەك مالدىبايەۆ ءسوز سويلەدى.
ءانشى احان ەركەبۇلان بالالار الدىندا ونەر كورسەتتى. قاراساي اۋدانىنىڭ “داريعا-اي، داۋرەن” ارداگەرلەر ۇيىمىنىڭ اجەلەر ءانسامبلى كونسەرتتىك باعدارلاما ۇسىندى.
بالالار مەرەكەسىندە الماتىداعى “قىستاۋباي ماناس”، “اسكەر اتا” جانە “ءابۋ باكىر” مەشىتتەرى وكىلدەرىنىڭ قولداۋمەن جازالى جاسوپىرىمدەر ءۇشىن مەرەكەلىك داستارقان جايىلىپ، تاتتىلەر دە مولىنان ۇسىنىلدى.
كاسىپكەر سمان بەكارىس بالالارعا سپورتقا ارنالعان اياقكيىمدەر سىيلادى. ال الماتى قالاسى بويىنشا قاج دەپارتامەنتى ارداگەرلەر كەڭەسى جاسوسپىرىمدەر يگىلىگى ءۇشىن كىر جۋاتىن ماشينا جانە شاش الاتىن قۇرىلعىلار تارتۋ ەتتى.
مەرەكەنىڭ ەڭ كوڭىلدى ءساتى، ارينە، تۇزەۋ مەكەمەسىندە تاربيەلەنىپ جاتقان بالالاردىڭ اتا-انا، تۋىستارىمەن قۇشاق جايا قاۋىشۋى بولدى.