كۇن تارتىبىندەگى ماڭىزدى ماسەلە – قالا مەكتەپتەرىندەگى قاۋىپسىزدىكتى قامتاماسىز ەتۋ.
الماتى پوليسياسىندا وتكەن ارنايى جيىندا مەكتەپ وقۋشىلارىنىڭ قاۋىپسىزدىگى تالقىلاندى، دەپ حابارلايدى Almaty-akshamy.kz Polisia.kz-كە سىلتەمە جاساپ.
الماتى قالاسى پوليسياسىنىڭ باستىعى ارىستانعاني زاپپاروۆتىڭ توراعالىعىمەن وتكەن جيىن جاڭا وقۋ جىلىنىڭ باستالۋىنا ورايلاستىرىلدى.
«ءبىلىم بەرۋ مەكەمەسىنىڭ قاۋىپسىزدىگى – بۇل ءبىلىم بەرۋ مەكەمەسىنىڭ جەرگىلىكتى اتقارۋشى جانە قۇقىق قورعاۋ ورگاندارىمەن بىرلەسىپ جۇزەگە اسىراتىن ءىس-شارالارىنىڭ جيىنتىعى. مەكتەپ وقۋشىلارىنىڭ قاۋىپسىزدىگى ءبىلىم بەرۋ مەكەمەلەرى اكىمشىلىگىنىڭ باستى مىندەتى ەكەندىگى ءسوزسىز، ءبىراق ءبىز دە شەتتە قالماۋىمىز كەرەك. بالالاردىڭ قاۋىپسىزدىگىن قامتاماسىز ەتۋ ماڭىزدى باعىتتاردىڭ ءبىرى ەكەندىگىن جانە وسى باعىتتا جۇمىس ىستەۋىمىز قاجەتتىگىن اتاپ وتكىم كەلەدى. قالادا 207 جالپى ءبىلىم بەرۋ مەكەمەسى بار، ولاردىڭ بارلىعى بەينەباقىلاۋ جۇيەسىمەن جابدىقتالعان، 4 960 بەينەكامەرا ورناتىلعان. ارينە، مەكتەپتەردە بەينەباقىلاۋ كامەرالارىنىڭ بولۋى قۇقىق بۇزۋشىلىقتىڭ الدىن الۋعا وڭ اسەرىن تيگىزەدى، ال ولاردىڭ پد جبو-نا قوسىلۋى زاڭسىز سيپاتتاعى ءتۇرلى كورىنىستەرگە جەدەل دەن قويۋعا مۇمكىندىك بەرەدى»، – دەدى ارىستانعاني زاپپاروۆ.
مەكتەپتەردى تەرروريستىك تۇرعىدان وسال ۇيىمداردىڭ تىزىمىنە ەنگىزۋ، ولاردى قورعاۋدى ساپالى تۇردە جاقسارتۋعا ءتيىس. مەكتەپتەردى تاجىريبەسى دە، ماتەريالدىق رەسۋرستارى دا بار، قىزمەتكەرلەردى وقىتۋعا قاتاڭ تالاپتار قوياتىن كۇزەت كومپانيالارى قورعاۋى كەرەك.
«ابىروي بولعاندا، وتكەن وقۋ جىلى مەكتەپتەردە وقىس وقيعالارسىز ءوتتى، وندا ەشقانداي قۇقىقبۇزۋشىلىق ورىن العان جوق. مەكتەپ وقۋشىلارى اراسىنداعى قىلمىس دەڭگەيىنىڭ تومەندەۋ تەندەنسياسىن جالعاستىرۋ ءۇشىن، ەسەپتە تۇرعان قيىن جاسوسپىرىمدەرمەن جانە ولاردىڭ اتا-انالارىمەن ماقساتتى جۇمىستى جالعاستىرۋ قاجەت. قۇقىقبۇزۋشىلىق پەن وز-وزىنە قول جۇمساۋعا بەيىم جاسوسپىرىمدەردى انىقتاۋ، قاجەتتى مامانداردى تارتا وتىرىپ، ولارمەن جەكە پروفيلاكتيكالىق جۇمىستاردى جۇرگىزۋ جۇمىستارىن جالعاستىرۋ. تاعى ءبىر ايتا كەتەرلىگى، وقۋ جىلىنىڭ باستالۋ قارساڭىندا مەكتەپتەر ماڭىندا كولىك قوزعالىسى قيىندايدى. 31 مىڭنان استام ءبۇلدىرشىن ءبىرىنشى سىنىپقا بارادى. ءبىز ولاردىڭ قاۋىپسىزدىگىن ءتيىستى دەڭگەيدە قامتاماسىز ەتۋ ءۇشىن بار كۇش-جىگەرىمىزدى سالۋىمىز كەرەك»، – دەدى زاپپاروۆ.
انىقتاما ءۇشىن: الماتى پوليسياسى جازعى دەمالىس كەزىندە «دەمالىس»، «ءجاسوسپىرىم» جانە «تۇنگى قالاداعى بالالار» اتتى ءۇش اۋقىمدى ءىس-شارا جۇرگىزدى، ناتيجەسىندە كامەلەتكە تولماعانداردىڭ ۇيلەرىنەن تىس جەردە بولۋىنىڭ 2 مىڭنان استام دەرەكتەرى انىقتالدى.