الماتىدا جاڭاجىلدىق مەرەكەلىك كۇندەر تىنىش ءوتىپ، وقىس وقيعا بولعان جوق. پوليسيانىڭ كۇشەيتىلگەن جۇمىس رەجيمى مەن جەدەل ارەكەت ەتۋ قىزمەتتەرىمەن بىرلەسىپ قيمىلداۋىنىڭ ارقاسىندا تۇرعىندار مەن قالا قوناقتارىنىڭ قوعامدىق ءتارتىبى مەن قاۋىپسىزدىگى قامتاماسىز ەتىلدى. وڭىرلىك كوممۋنيكاسيالار قىزمەتىندە الماتى قالالىق پد قوعامدىق قاۋىپسىزدىك باسقارماسى باستىعىنىڭ ورىنباسارى ايتان ەلەۋسىزوۆ وسىلاي دەپ مالىمدەدى، - دەپ حابارلايدى aqshamnews.kz ءتىلشىسى.
ونىڭ ايتۋىنشا، 15 جەلتوقساننان باستاپ جەكە قۇرام كۇشەيتىلگەن. ادام كوپ جينالاتىن ورىندارعا – الاڭدارعا، ساياباقتارعا، جاڭاجىلدىق جانە مادەني-بۇقارالىق ءىس-شارا وتەتىن جەرلەرگە ءتارتىپ ساقشىلارى كوپ نازار اۋدارىپتى.
قالانىڭ نەگىزگى الاڭدارىندا ورناتىلعان بارلىق قالالىق جاڭاجىلدىق شىرشالار مەن ولارعا ىرگەلەس اۋماقتار پوليسيانىڭ تۇراقتى باقىلاۋىندا بولدى. مەرەكە كۇندەرى جاياۋ جانە اۆتوساقشىلار جاعى كۇشەيتىلىپ، ساقشىلاردىڭ قوسىمشا كۇشتەرى، ۋچاسكەلىك ينسپەكتورلار مەن مامانداندىرىلعان بولىمشەلەردىڭ ەكيپاجدارى تىنباي جۇمىس ىستەدى.
1–4 قاڭتار ارالىعىندا الماتىدا 45 قىلمىس تىركەلدى. ولاردىڭ 32ء-سى پاترۋلدىك پوليسيا مەن ۋچاسكەلىك ينسپەكتورلاردىڭ كۇشىمەن «ءىزى سۋىماي» جاتىپ اشىلدى. سونىمەن قاتار، قوعامدا دۇربەلەڭ تۋدىرۋى مۇمكىن اسا اۋىر قىلمىستار مەن قۇقىق بۇزۋشىلىقتارعا جول بەرىلگەن جوق.
بۇزاقىلىق، سونداي-اق تۇرمىستىق جانە وتباسىلىق-تۇرمىستىق جانجال سياقتى نەگىزىنەن مەرەكە كۇندەرى جيىلەپ كەتەتىن قۇقىق بۇزۋشىلىق كوپ تىركەلگەن ەكەن. بارلىق حابارلاماعا پوليسيا دەر كەزىندە نازار اۋدارعان.
«وسى كۇندەرى قىلمىستىڭ الدىن الۋعا كوپ كوڭىل ءبولىندى. پوليسيانىڭ كوشەنى، تۇرعىلىقتى جەرلەر مەن قوعامدىق كەڭىستىكتەردى بارلاپ جۇرگەنى قاۋىپسىزدىك پەن ءتارتىپتى ساقتاۋعا ىقپال ەتتى»، – دەيدى ايتان جانامان ۇلى.
الماتى قالالىق پوليسيا دەپارتامەنتىندە قوعامدىق ءتارتىپ پەن قالا تۇرعىندارىنىڭ قاۋىپسىزدىگىن قامتاماسىز ەتۋ جۇمىستارى بۇدان ءارى دە «زاڭ جانە ءتارتىپ» قاعيداتى اياسىندا جالعاسا بەرەتىنىن اتاپ ءوتتى.