قاسىم-جومارت كەمەل ۇلى توقايەۆتىڭ «تۇركىستان گازەتىنە» بەرگەن «قازاقستان جاڭعىرۋدىڭ جاڭا كەزەڭىنە قادام باستى» اتتى سۇحباتى بۇگىنگى قوعامنىڭ جاي-كۇيىن تارازىلاپ، ەل دامۋىنىڭ الداعى باعىتىن ايقىنداپ بەردى.
سۇحبات بارىسىندا مەملەكەت باسشىسى جۇرگىزىلىپ جاتقان رەفورمالاردىڭ ءمانى مەن ماڭىزىن اشىپ كورسەتىپ، ولاردىڭ تۇپكى ماقساتى – ادىلەتتى مەملەكەت، ينكليۋزيۆتى ەكونوميكا جانە جاۋاپتى قوعام قالىپتاستىرۋ ەكەنىن ناقتى اتاپ ءوتتى.
پرەزيدەنت ەرەكشە ءمان بەرگەن باسىم باعىتتاردىڭ ءبىرى – الەۋمەتتىك ادىلەتتىلىك پەن تەڭ مۇمكىندىك. باي مەن كەدەي اراسىنداعى الشاقتىقتى ازايتۋ، تابىستى ءادىل ءبولۋ، الەۋمەتتىك قولداۋدىڭ ناقتى مۇقتاج ازاماتتارعا جەتۋىن قامتاماسىز ەتۋ – مەملەكەتتىڭ باستى مىندەتى ەكەنى سۇحبات بارىسىندا ناقتى ايتىلدى. بۇل – قوعامنىڭ ەڭ وزەكتى سۇرانىستارىنا بەرىلگەن شىنايى ءارى باتىل جاۋاپ. سونىمەن قاتار مەملەكەت باسشىسى ءبىلىم مەن عىلىمدى، مادەنيەت پەن رۋحانياتتى ۇلتتىڭ ۇزاق مەرزىمدى دامۋىنىڭ وزەگى رەتىندە قاراستىرادى. ەلدىڭ بولاشاعى تەك ەكونوميكالىق كورسەتكىشتەرمەن ەمەس، ەڭ الدىمەن ادام كاپيتالىنىڭ ساپاسىمەن، تاربيەلى ءارى جاۋاپكەرشىلىگى جوعارى ازاماتتارمەن ولشەنەتىنى ناقتى اتاپ ءوتىلدى. وسى ورايدا مۇعالىمدەر مەن مادەنيەت قىزمەتكەرلەرىنىڭ مارتەبەسىن كوتەرۋ، ءبىلىم ساپاسىن ارتتىرۋ ستراتەگيالىق باسىمدىق بولىپ قالا بەرمەك.
سۇحباتتا زاڭ ۇستەمدىگى، ءادىل سوت جۇيەسى جانە جەمقورلىقپەن جۇيەلى كۇرەس ماسەلەلەرى دە كەڭىنەن قوزعالدى. مەملەكەت تەك تالاپ قوياتىن ەمەس، زاڭ الدىندا ءوزى دە جاۋاپ بەرەتىن قۇرىلىمعا اينالۋى ءتيىس دەگەن وي – ازاماتتاردىڭ مەملەكەتكە دەگەن سەنىمىن نىعايتۋدىڭ باستى العىشارتى ەكەنى ءسوزسىز.
وڭىرلەردىڭ تەڭ دامۋى، اۋىلدى قولداۋ، ينفراقۇرىلىمدى جاڭعىرتۋ ماسەلەلەرى دە سۇحباتتا ناقتى كورىنىس تاپتى. بۇل باعىتتاعى باستامالار وڭىرلەردىڭ الەۋەتىن تولىق پايدالانىپ، الەۋمەتتىك جانە مادەني ينفراقۇرىلىمدى دامىتۋعا مۇمكىندىك بەرەتىنى انىق. سونداي-اق پرەزيدەنت قوعامدىق ديالوگ پەن ازاماتتىق جاۋاپكەرشىلىكتىڭ ماڭىزىن ەرەكشە اتاپ ءوتىپ، جاڭا قازاقستاندى تەك بيلىك ەمەس، بۇكىل قوعام بولىپ بىرلەسە قۇرۋ قاجەتتىگىن باسا ايتتى. ءاربىر ازامات ەل تاعدىرىنا بەيجاي قاراماي، رەفورمالاردىڭ بەلسەندى قاتىسۋشىسىنا اينالۋى ءتيىس دەگەن ماڭىزدى ۇندەۋ جاسالدى.
مەملەكەت باسشىسىنىڭ بۇل سۇحباتى جاڭعىرۋدىڭ جاڭا كەزەڭىنە قادام باسقان قازاقستاننىڭ ايقىن باعىتىن، مەملەكەتتىڭ حالىق الدىنداعى جاۋاپكەرشىلىگىن جانە ورتاق ماقساتقا نەگىزدەلگەن دامۋ فيلوسوفياسىن كورسەتەتىن ماڭىزدى ساياسي مالىمدەمە بولدى. پرەزيدەنت بەلگىلەگەن سارا جول – ەلدىڭ تۇراقتى دامۋى مەن ۇلت بولاشاعىنا باستايتىن سەنىمدى باعدار. وسى جولدا بىرلەسە ەڭبەك ەتۋ – بارشامىزدىڭ ازاماتتىق بورىشىمىز.