ۇيىمداسقان قىلمىستىق توپتاردىڭ ءبىرىنىڭ مۇشەلەرىنەن اسكەري ارسەنال تاركىلەندى.
ءىس-شارانى پوليسيا قىزمەتكەرلەرى الماتى قالاسى بويىنشا ۇقكد-نىڭ كومەگىمەن جۇرگىزدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
"ءبىرقاتار اۋىر جانە اسا اۋىر قىلمىستاردى جاساعانى ءۇشىن وسى ۇيىمداسقان قىلمىستىق توپتىڭ بەس مۇشەسى ۇستالدى جانە قاماۋعا الىندى. كەشەندى جەدەل جانە ارنايى ءىس-شارالاردى جۇرگىزۋ بارىسىندا ولاردىڭ الماتى وبلىسى اۋماعىندا بىرنەشە قارۋ جاسىرۋ ورىندارىن ۇيىمداستىرۋ دەرەكتەرى انىقتالدى. ناتيجەسىندە ەكى “كالاشنيكوۆ” اۆتوماتى (اكس)، “ماكاروۆ” جانە “تت” جۇيەلەرىنىڭ ەكى جاۋىنگەرلىك تاپانشاسى، ءۇش اڭشىلىق كارابين، ەكى تەگىس ۇڭعىلى ۆينچەستەر، 13 كەسىلگەن اڭشى مىلتىعى، 53 اڭشى مىلتىعى، ءۇش تراۆماتيكالىق تاپانشا، سونداي-اق، ءارتۇرلى اتىس قارۋىنا ارنالعان 200-دەن استام ءوق-دارى تابىلدى. سونىمەن قاتار ۇيىمداسقان قىلمىستىق توپ مۇشەلەرىنەن ەكى جاۋىنگەرلىك جانە ءتورت جارىق شۋلى گراناتا، ءتورت پىشاق، ەكى ءپورتاتيۆتى راديوستانسيا، سونداي-اق، ءارتۇرلى ارنايى قۇرالدار – وپتيكالىق كوزدەۋىشتەر، وق وتكىزبەيتىن جيدە، تاياقشا جانە ت.ب. تاركىلەندى. سوڭعى قارۋ-جاراق جاسىرىلعان ورىندى كەشە عانا انىقتادىق"، – دەدى الماتى قالالىق پوليسيا دەپارتامەنتى باستىعىنىڭ ورىنباسارى بەرىك ابىلبەكوۆ.
قارۋ مەن وق-دارىلەردى زاڭسىز ساقتاۋ دەرەگى بويىنشا، ق ر قك-نىڭ 287-بابى 3-بولىگىنىڭ نورمالارىنا سايكەس، سوتقا دەيىنگى تەرگەۋ امالدارى جۇرگىزىلۋدە. تاركىلەنگەن ارسەنال ساراپتاماعا جىبەرىلدى، ونىڭ قورىتىندىسى بويىنشا تاركىلەنگەن قارۋ-جاراق پەن وق-دارىلەردىڭ شىعۋ تەگى مەن يەسى انىقتالاتىن بولادى.