الماتىدا جاڭا جىل ءتۇنى جاسالعان پاتەر ۇرلىعى اشكەرەلەندى، قالانىڭ اۋەزوۆ اۋدانىندا ءۇش ەر ادام پاتەر يەلەرىنىڭ جوقتىعىن پايدالانىپ، تۇرعىن ۇيگە زاڭسىز كىرگەن، دەپ حابارلايدى aqshamnews.kz
كۇدىكتىلەر سيفرلىق جانە شاعىن تۇرمىستىق تەحنيكانى، التىننان جاسالعان زەرگەرلىك بۇيىمداردى، سونداي-اق اقشالاي قاراجاتتى قولدى ەتكەن. كەلتىرىلگەن ماتەريالدىق شىعىننىڭ جالپى سوماسى 3 ميلليون تەڭگەدەن استى.
جەدەل ىزدەستىرۋ ءىس-شارالارىنىڭ ناتيجەسىندە كۇدىكتى ءۇش ازاماتتىڭ جەكە باستارى انىقتالىپ، بارلىعى ۇستالدى.
ارنايى وپەراسيانى قالالىق پوليسيا دەپارتامەنتىنىڭ كريمينالدىق پوليسيا قىزمەتكەرلەرى اۋەزوۆ اۋداندىق پوليسيا باسقارماسىمەن جانە پوليسيانىڭ ارنايى ماقساتتاعى بولىمشەسىمەن بىرلەسىپ جۇرگىزدى.
تەرگەۋ بارىسىندا ۇستالعانداردىڭ ەكەۋى بۇعان دەيىن بوتەننىڭ مۇلكىن ۇرلاۋ دەرەكتەرى بويىنشا قىلمىستىق جاۋاپكەرشىلىككە تارتىلعانى بەلگىلى بولدى.
اتالعان فاكتى بويىنشا سوتقا دەيىنگى تەرگەپ-تەكسەرۋ امالدارى جۇرگىزىلۋدە. كۇدىكتىلەر ۋاقىتشا ۇستاۋ يزولياتورىنا قامالدى. سونداي-اق ولاردىڭ وسىعان ۇقساس وزگە دە قىلمىستارعا قاتىسى بارىن تەكسەرىپ جاتىر.
"كۇدىكتىلەر مەرەكەلىك ءتۇنى پاتەر يەلەرى ۇيدە بولمايدى، ال ادامداردىڭ نازارى مەيرامعا اۋعان بولادى دەپ ۇمىتتەنگەن. الايدا ولاردىڭ زاڭسىز ارەكەتتەرى دەر كەزىندە اشكەرەلەندى. ءۇش كۇدىكتى دە ۇستالىپ، ۇرلانعان مۇلىكتىڭ ءبىر بولىگى تاركىلەندى. قازىرگى ۋاقىتتا ولاردىڭ قىلمىستىق ارەكەتتەرىنىڭ وزگە دە ەپيزودتارىن انىقتاۋ جۇمىستارى جالعاسۋدا"، — دەدى الماتى قالالىق پوليسيا دەپارتامەنتى كريمينالدىق پوليسيا باسقارماسىنىڭ باستىعى اسحات داۋلەتياروۆ.