ءبىرىڭعاي جيناقتاۋشى زەينەتاقى قورى بيىل جمزج مولشەرى قىزمەتكەردىڭ تابىسىنىڭ 3،5 پايىزى بولعانىن ەسكە سالدى، دەپ حابارلايدى aqshamnews.kz
ءدال وسى سومانى جۇمىس بەرۋشى قىزمەتكەر ءۇشىن بجزق-عا اۋدارۋعا مىندەتتى.
جمزج جىل سايىن كەزەڭ-كەزەڭىمەن ءوسىپ كەلەدى. بىلتىر مولشەرلەمە 2،5 پايىز بولسا، 2024 جىلى 1،5 پايىز بولعان.
جوسپار بويىنشا، 2027 جىلى جارنا مولشەرى - 4،5 پايىز، ال 2028 جىلى 5 پايىز بولادى.
انىقتاما: جمزج - بۇل جۇمىس بەرۋشى قىزمەتكەردىڭ ءوز مىندەتتى زەينەتاقى جارنالارىنا قوسىمشا رەتىندە تولەيتىن جارنالار.
جمزج كىمدەرگە تولەنەدى؟
2024 جىلدىڭ 1 قاڭتارىنان باستاپ قازاقستاندا جۇمىس بەرۋشىلەر ءوز قىزمەتكەرلەرى ءۇشىن زەينەتاقى جارنالارىن بجزق-عا اۋدارۋعا مىندەتتى.
جمزج 1975 جىلى تۋعان جانە ودان كەيىن تۋعان ازاماتتارعا ارنالعان. بۇل ساناتتاعى ادامداردىڭ 1998 جىلعا دەيىنگى ەڭبەك ءوتىلى از نەمەسە مۇلدە بولماعاندىقتان، ولار ىنتىماقتى زەينەتاقى الۋ قۇقىعىنا تولىق يە بولا المايدى. ناتيجەسىندە ولاردىڭ زەينەتاقىسى ءۇش بولىكتەن تۇرادى:
بازالىق - مەملەكەتتەن؛
جيناقتاۋشى - قىزمەتكەردىڭ ءوز جارنالارى ەسەبىنەن؛
شارتتى-جيناقتاۋشى - جۇمىس بەرۋشىنىڭ جارنالارى (جمزج) ەسەبىنەن.
1975 جىلدان بۇرىن تۋعان قىزمەتكەرلەرگە، زەينەتكەرلەرگە، 1–2 توپتاعى مۇگەدەكتىگى بار ادامدارعا، سونداي-اق اسكەري قىزمەتشىلەر مەن ولارعا تەڭەستىرىلگەن تۇلعالارعا جۇمىس بەرۋشىلەر جمزج تولەمەيدى. تولەمدەردىڭ ۋاقتىلى اۋدارىلۋىن قارجى مينيسترلىگىنىڭ مەملەكەتتىك كىرىستەر كوميتەتى باقىلايدى.
جمزج ەسەبىنەن تولەنەتىن زەينەتاقى تولەمدەرى ءومىر بويىنا تاعايىندالادى. الايدا تۇراقتى تۇرۋ ءۇشىن شەتەلگە كوشكەن نەمەسە ازاماتتىعىن وزگەرتكەن جاعدايدا بۇل تولەمدەر توقتاتىلادى. بۇل رەتتە تەك قىزمەتكەردىڭ جەكە جيناقتاۋشى جارنالارىن عانا الۋعا بولادى، ال جمزج قاراجاتى بجزق-دا قالادى، ويتكەنى ول قىزمەتكەردىڭ مەنشىگى بولىپ سانالمايدى جانە مۇراعا قالدىرىلمايدى. ازاماتتىعىن وزگەرتكەن نەمەسە قايتىس بولعان ادامدار ءۇشىن اۋدارىلعان جارنالار جۇيە قاتىسۋشىلارى اراسىندا قايتا بولىنەدى.