وبلىستاعى اكىمدەر ەكى اپتادا گەوكارتا جاساپ، مالىمەت بەرۋى كەرەك.
الماتى وبلىسىنىڭ اكىمى مارات سۇلتانعازييەۆ بارلىق اۋىلدىق وكرۋگتىڭ سۋ قۇبىرلارىن تەكسەرىپ، تۇگەندەۋ جۇمىسىن جۇرگىزۋدى تاپسىردى، دەپ حابارلايدى Almaty-akshamy.kz.
«قونايەۆ قالاسى مەن اۋدان اكىمدەرىنىڭ باسىن قوسقان القالى جيىندا وبلىس باسشىسى تۇرعىندار تاراپىنان سۋعا قاتىستى ارىز-شاعىم جيىلەپ كەتكەنىن العا تارتتى»، - دەلىنگەن الماتى وبلىسى باسپا ءسوز قىزمەتىنىڭ حابارلاماسىندا.
مارات سۇلتانعازييەۆتىڭ ايتۋىنشا، جالپى، وڭىردەگى اۋىلداردا سۋعا قاتىستى تۋىنداپ وتىرعان ماسەلە كوپ. كەيبىر سۋ قۇبىرىندا قىسىم جەتكىلىكسىز، كەيبىرىندە ماگيسترالدىق سۋ جۇيەسى رەتتەلمەگەن. ەندى بىرىندە سۋ سۇزگىسى جولعا قويىلماعان.
«وسى ماسەلەلەردىڭ ءبارىن اۋىل اكىمدەرىمەن بىرلەسىپ، تەكسەرىستەن وتكىزىپ، جوبا-جوسپارىن جاساپ الايىق. وبلىستى گازداندىرۋ جانە باسقا دا سالا بويىنشا جۇمىستاردى وسىلاي كارتاعا ءتۇسىرىپ، رەت-رەتىمەن ىستەۋىمىز كەرەك. كوگىلدىر وتىن كەلدى، گاز بار دەپ ايتقانىمىزبەن ءىس جۇزىندە ءبارى باسقاشا. ۇياتتى بولسا دا ايتايىق، گازدى جەكە تۇرعىن ۇيلەر تۇرماق، اۋرۋحانالارعا ءالى تولىق تارتا الماي وتىرمىز. سۋ ماسەلەسى دە سولاي. سۋ بار دەيمىز، ءبىراق ءىس جۇزىندە كوشەدەن تاسىپ ءىشىپ، ماشاقاتىن كورىپ جۇرگەن اۋىل تۇرعىندارى جەتەرلىك»، – دەدى مارات ەلەۋسىز ۇلى.
وبلىس اكىمى جيىندا اتالعان ماسەلەلەردى شەشۋ ءۇشىن ەڭ الدىمەن وڭىرلەردى سۋمەن جانە كوگىلدىر وتىنمەن قامتاماسىز ەتۋ بويىنشا تەكسەرۋ، تۇگەندەۋ جۇمىسىن جۇرگىزۋدى مىندەتتەدى.
«ەكى اپتا ۋاقىت بەرەمىن. بۇكىل اۋدان-اۋدانداعى ەلدى مەكەن، اۋىلدار بويىنشا سۋ، گاز، تاعى دا باسقا ماسەلەلەر بويىنشا گەوكارتا جاساپ، مالىمەت بەرىلۋى كەرەك. قاي اۋىلدا قاي قۇبىر ىستەمەيدى، قاي قۇبىر تولىق جۇمىس ىستەپ تۇر، قاي قۇبىردىڭ قۇرىلىسى ورتا جولدا قالىپ قويعان، وسىنىڭ ءبارى كارتادا كورسەتىلگەنى ءجون. ەگەر ءبىز وسىلاي جۇيەلەپ الماساق، وندا ماسەلەنىڭ شەشىمىن تابۋ قيىن. ءقازىر ستاتيستيكاعا، دەرەكتەرگە ءبارىنىڭ قولى جەتەدى. جاسىرىپ قايتەمىز، جوقتى جوق، باردى بار دەپ ايتۋ كەرەك. ونىڭ ۇستىنە ءقازىر اۋىل اكىمدەرىن سايلاپ جاتىرمىز. حالىق ولارعا سەنىپ وتىر. اكىمدەر بار كۇشىن سالىپ، ۇلكەن ۇمتىلىسپەن، ىنتا-ىقىلاسپەن جۇمىس ىستەۋى قاجەت»، – دەپ تۇيىندەدى الماتى وبلىسىنىڭ اكىمى.