بۇل تۋرالى الماتى قالاسى اكىمدىگىنىڭ قالالىق موبيلدىلىك باسقارماسى باسشىسىنىڭ ورىنباسارى ەرنۇر ابجاحان حابارلادى.
بۇگىن ول وڭىرلىك كوممۋنيكاسيالار قىزمەتىنىڭ الاڭىندا مەگاپوليستىڭ جول ينفراقۇرىلىمىن دامىتۋ تۋرالى ايتتى، دەپ حابارلايدى Almaty-akshamy.kz.
ە. ابجاحاننىڭ ايتۋىنشا، الماتى قالاسىنىڭ كوشە-جول جەلىسىنىڭ ۇزىندىعى 3096 شاقىرىمدى قۇرايدى، ونىڭ 234 شاقىرىمى اسفالتتالماعان.
«ءبىز 2025 جىلعا قاراي قالاداعى جاقسى جولداردىڭ ۇلەسىن 95%-عا جەتكىزۋدى جوسپارلاپ وتىرمىز. ول ءۇشىن 234 كم جاڭا جول سالامىز، جىل سايىن كەمىندە 200 كم جولعا ورتاشا جوندەۋ جۇرگىزۋدى جوسپارلاپ وتىرمىز»، - دەپ حابارلادى سپيكەر.
ە. ابجاحان جولداردىڭ قۇرىلىسى تۋرالى ايتا كەلە، بۇقتىرما كوشەسى – قۇلجا تراكتىسى، سەيفۋللين داڭعىلى – جانسۇگىروۆ كوشەسى جانە ساين كوشەسى – موڭكە بي كوشەسى ءۇش جولايرىعىنىڭ قۇرىلىسى بويىنشا جۇرگىزىلىپ جاتقان جۇمىستار تۋرالى باياندادى.
بۇقتىرما – قۇلجا تراكتىسى كوشەلەرىنىڭ قيىلىسىنداعى جۇمىستار بەكىتىلگەن كەستەگە سايكەس جۇرگىزىلىپ جاتقانى بەلگىلى بولدى. جەر ۋچاسكەلەرىن ساتىپ الۋ اياقتالدى. قاراجات تولىق كولەمدە ءبولىندى.
«1 قىركۇيەككە دەيىن ەستاكادا مەن پاندۋستاردى سالۋ بويىنشا قۇرىلىس-مونتاج جۇمىستارىن اياقتاپ، سول ارقىلى بارلىق باعىتتار بويىنشا كولىكتەردىڭ ءجۇرۋىن قامتاماسىز ەتۋ جوسپارلانۋدا. اباتتاندىرۋدى ەسكەرە وتىرىپ، تولىق اياقتاۋ 2022 جىلدىڭ سوڭىنا دەيىن جوسپارلانىپ وتىر»، - دەدى اكىمدىكتىڭ قمب وكىلى.
سەيفۋللين داڭعىلى مەن جانسۇگىروۆ كوشەسىنىڭ قيىلىسىنداعى جۇمىستار دا ساتىپ الىنعان ۋچاسكەلەردە جۇرگىزىلۋدە. جۇمىستاردى تولىق اياقتاۋ 2023 جىلعا جوسپارلانعان.
ساين - موڭكە بي كوشەلەرىندەگى جول ايرىعىنىڭ قۇرىلىسى بويىنشا دايىندىق جۇمىستارى باستالدى. جسق تۇزەتىلۋدە. بيىل كوممۋنيكاسيالاردى قايتا قۇرۋ جانە اينالما جولداردى سالۋ بويىنشا جۇمىستار جوسپارلانۋدا، ال جۇمىستاردى تولىق اياقتاۋ كەلەسى جىلدىڭ سوڭىنا جوسپارلانعان.