ون بالانىڭ ۇشەۋى اۋرۋحانادا جاتىر
الماتى وبلىسىندا ۋلانعان 10 وقۋشى بەلگىسىز جازۋى بار، شەتەلدىك تاعامنان زيان شەگۋى مۇمكىن. وسىلاي دەگەن مەكتەپ ديرەكتورى مەن اتا-انالار دۇكەننەن ساتىپ العان تۇزدالعان تاياقشالاردى جەگەننەن سوڭ، جەتكىنشەكتەردىڭ جاعدايى ناشارلاي تۇسكەنىن ايتادى، دەپ حابارلايدى Almaty-akshamy.kz Almaty.tv-گە سىلتەمە جاساپ.
بايتەرەك اۋىلىندا ۋلانعان 10 وقۋشىنىڭ ۇشەۋى اۋرۋحانادا جاتقانىنا بۇگىن ءتورتىنشى كۇن. جەلىدە جەلدەي ەسكەن جازبا ارقىلى تۇتاس اۋىل ءقازىر ۇشىنعان وقۋشىلاردىڭ جاعدايىنا الاڭداۋلى. ەڭ سوراقىسى دا سول – ءولىم اۋزىنان امان قالعان جەتكىنشەكتەر بەلگىسىز تاعامدى دا سول جەلى ارقىلى تانىپ، كورگەن ەكەن.
–10 قىز اقشا شىعارىپ، اششى تاياقشا الىپ جەگەن. سونى جەپ، ۋلانىپ قالدى. مەنەن «الىپ جەسەم بولا ما» دەپ سۇراپ جۇرگەن. مەكتەپتىڭ اسحاناسىنا شاعىم جوق، ويتكەنى مەنىڭ قىزىم اسحانادان تاماق ىشپەيدى، – دەپ حابارلايدى اتا-انا رازيا.
جۇڭگو تاياقشالارىن جەگەننەن سوڭ تالىپ قۇلاعان 10 وقۋشى بايتەرەك اۋلىنداعى مەكتەپتە ءبىلىم الادى. ۇستازدارى «ولار ءبىرىنشى ساباقتا-اق جۇرەگى اينىپ، قۇسا باستادى» دەيدى. كەيىن وسى مەكەمەدەن بىردەن اۋرۋحاناعا جەتكىزىپتى.
– قىتايشا جازىلعان، نە قازاق، نە ورىس تىلىندە اۋدارىلماعان، ساقتاۋ مەرزىمى جوق زاتتى الىپ جەمەڭدەر» دەپ سىنىپتى ارالاپ بارىنە ايتىپ شىقتىم. اتا-انالارعا دا ەسكەرتتىك، – دەدى بايتەرەك ورتا مەكتەبىنىڭ ديرەكتورى جازيرا بالاحان.
جالپاق جۇرت جامان اتتى قىلعان جەرگىلىكتى دۇكەنگە ءبىز دە باس سۇقپاق بولىپ باردىق. و باستا ەسىگىن تارس جاۋىپ، ءبىزدى كىرگىزبەي قويدى.
تۇزدالعان تاياقشالاردى جەپ ۋلاندى دەگەن 10 وقۋشى ءدال وسى دۇكەننەن ساتىپ العان. مۇنداعى ساتۋشىلار دا ونى راستاپ وتىر. ولاردىڭ ايتۋىنشا، سۇرانىس بولعان سوڭ، سورەگە اكەلىپ قويعان. سوندىقتان اتى جازىلماعان، زاتى بەلگىسىز تاۋاردى تەكسەرمەي ساتقانىمىزعا كىنالى ەكەنىن مويىندايدى.
– وقۋشىلار ۋلانعانى جونىندە ماماندار تاراپىنان ناقتى اقپارات ايتىلمادى عوي. ازىرگە ءبارى جالعان. ءبىزدىڭ قاتەلىگىمىز - قىتايشا جىزىلعان ءسوزدى تۇسىنبەدىك، تاۋاردى قابىلداپ العاندا ساقتاۋ مەرزىمىنە مۇقيات قارايمىز، – دەدى دۇكەن ساتۋشىسى روزا جانىقۇلوۆا.
ال اۋداندىق اۋرۋحاناعا تۇسكەن 10 بالانىڭ جەتەۋى امبۋلاتوريالىق ەم الۋ ءۇشىن ۇيىنە جىبەرىلىپتى. ال ۇشەۋىندە ءالى السىزدىك بار. سوندىقتان ساقتىق ءۇشىن ءقازىر دارىگەر باقىلاۋىندا ەكەن.
– ون ناۋقاس "جەدەل جاردەم" كولىگىمەن جەتكىزىلدى. ناۋقاستاردى تولىق مەديسينالىق تەكسەرۋدەن وتكىزىپ، بەلگىسىز تاعاممەن ۋلانعانى بەلگىلى بولدى. ءقاۋىپتى تاعام، حيميالىق زاتتارمەن 5 جاسقا دەيىنگى بالالار ۋلانادى. ءۇي جاعدايىندا بالانىڭ دەنساۋلىعىنا وتە ءقاۋىپتى، ءولىپ كەتۋى مۇمكىن، – دەدى ەڭبەكشىقازاق اۋدانى ورتالىق اۋرۋحاناسى ديرەكتورىنىڭ ورىنباسارى ءاليا وماربەكوۆا.
– 2023 جىلدىڭ 19 مامىرىندا ءونىم مەن جەتكىزۋشىنى انىقتاۋ ماقساتىندا تەرگەۋ جۇمىستارى باستالىپ، ناتيجەسىندە شىعۋ تەگى بەلگىسىز تاياقشانىڭ ساتىلىمدا جوق ەكەنى انىقتالدى. ءوتىنىمدى راستايتىن ءتيىستى قۇجاتسىز جۇرگىزىلگەن، – دەدى الماتى وبلىستىق سانيتارلىق-ەپيدەميولوگيالىق باقىلاۋ دەپارتامەنتىنىڭ باسپا ءسوز حاتشىسى تەمىرلان ايتبايەۆ.
ال اتالعان ىسكە قاتىستى كىنالى تاراپتاردى انىقتاۋ ءۇشىن ماتەريال تالعار اۋداندىق پوليسيا باسقارماسىنا جونەلتىلىپتى.