ەلىمىزدە سوڭعى جىلدارى 1500 زاڭسىز تۇرمىستىق قالدىق پوليگونى جويىلعان
قوقىس پوليگونى بالالاردىڭ ويىن الاڭىنا اينالدى. بۇلدىرشىندەر مۇندا كەشقۇرىم قالدىق جينايتىن كورىنەدى. الماتىنىڭ ناۋرىزباي اۋدانى اۋماعىنان زاڭسىز ءىرى قوقىس الاڭىن قالالىق ەكولوگيا دەپارتامەنتىنىڭ وكىلدەرى انىقتاعان. ماماندار "مەكتەپتەن قايتقان وقۋشىلار لاس جەردى اينالىپ وتۋگە ەرىنىپ، كارەردىڭ ىشىنە قۇلاپ كەتە مە» دەپ الاڭدايدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
بيىل عارىشتان باقىلاۋ كەزىندە قالا اۋماعىندا 6 زاڭسىز قوقىس ورنى انىقتالعان. ونىڭ تورتەۋى جينالسا، تۇركسىب جانە ناۋرىزباي اۋدانىنداعى قوقىس ۇيىندىلەرى ءالى بار. الايدا ناۋرىزباي اۋدانىنىڭ قيىندىعىن شەشۋ ءۇشىن اگلومەراسيا ماسەلە بولىپ تۇر. سەبەبى ايماق ناۋرىزباي اۋدانىنا قاراستى بولسا، تومەنگى تۇسى قاراساي اۋدانىنىڭ مەنشىگىنە جاتادى.
ال ەندى ماسەلەنى شەشۋ تەك قالالىق ەكولوگيا دەپارتامەنتىنە ەمەس، الماتى وبلىسىنا قاراستى قاراساي اۋدانىنىڭ قۇزىرلى ورگان وكىلدەرىنە دە بايلانىستى. ولاردىڭ ايتۋىنشا، تازالىق جۇمىسىن الدەقاشان باستاپ كەتكەن.
– الماتى اگلومەراسياسى باعدارلاماسى اياسىندا الماتى قالاسىنا جاقىن شەكارالاس ورنالاسقان 5 اۋدان - تالعار، ەڭبەكشىقازاق، ىلە، قاراساي، جامبىل اۋدانىندا دا زاڭسىز قوقىس ورىندارىن جويۋ جونىندە الماتى وبلىسى مەن الماتى قالاسىنىڭ قۇزىرلى ورگاندارى مەن اكىمشىلىگى بىرلەسكەن ءىس-شارالار اتقارىلىپ جاتقاندىعىن جەتكىزگىم كەلەدى، – دەدى الماتى وبلىسى ەكولوگيا دەپارتامەنتىنىڭ باسشىسى قونىسبەك بايەدىلوۆ.
– وبلىس تۇرعىندارى قوقىس لاقتىرادى. قازىرگى تاڭدا الماتى وبلىسىمەن بىرلەسە وتىرىپ، جينايتىن بولامىز، – دەدى ەكولوگيا دەپارتامەنتىنىڭ رەسمي وكىلى ءادىل نۇرپەيىسوۆ.
جەرگىلىكتى ورگان وكىلدەرىنىڭ ايتۋىنشا، قوقىس پوليگونى ورنالاسقان ورىنعا اباي داڭعىلى ءتۇسىپ، ول ۇلكەن الماتى اينالمالى جولىنا جالعاسادى. سوندىقتان كارەر ماڭىنداعى ۇيلەر ءسۇرىلىپ جاتىر. مامانداردىڭ ايتۋىنشا جەرگىلىكتى تۇرعىنى بولماعاندىقتان، قۇرىلىس قالدىقتارىنان بولەك، مۇندا تۇرمىستىق زاتتار دا توگىلىپ جاتىر.
– قاراۋسىز قالعان جەردە قوقىس شاشىلىپ جاتىر. ويتكەنى جان-جاقتان الىپ كەلەدى. بيىل 25 جەردە جەلىلىك سەنبىلىك وتكىزىلدى. ەرتەڭ وسىندا وتكىزەمىز دەپ جوسپارلاپ وتىرمىز، – دەدى ناۋرىزباي اۋدانى كورىكتەندىرۋ ءبولىمىنىڭ باس مامانى بولات وڭعاربايەۆ.
رەسمي دەرەك بويىنشا، ەلىمىزدە سوڭعى جىلدارى 1500 زاڭسىز تۇرمىستىق قالدىق پوليگونى جويىلعان. ءبىراق ءالى دە 6 مىڭ زاڭسىز قوقىس ورنى قالعان. ال رۇقسات ەتىلگەن 3500 پوليگوننىڭ تەك 17،7 پايىزى عانا ەكولوگيالىق جانە سانيتارلىق تالاپتارعا ساي.