24 جەلتوقساندا الماتى وبلىسى پوليسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى ق ر ءىىم كريمينالدىق پوليسيا دەپارتامەنتىمەن بىرلەسىپ، ارنايى بولىمشەنىڭ كۇشتىك قولداۋىمەن جانە كينولوگيالىق قىزمەت ورتالىعىن تارتا وتىرىپ، الماتى وبلىسىنىڭ اۋماعىندا جەدەل ىزدەستىرۋ ءىس-شارالارىنىڭ كەشەنىن وتكىزدى، - دەپ حابارلايدى Aqshamnews.kz.
وپەراسيا بارىسىندا جەدەل قىزىعۋشىلىق تۋدىرعان بىرنەشە مەكەنجاي ءبىر مەزگىلدە تەكسەرىلدى. ىلە اۋدانىنىڭ بايسەركە جانە الي اۋىلدارىندا سانكسيالانعان ءتىنتۋ بارىسىندا ەرەكشە ءيىسى بار وسىمدىك تەكتەس زاتتار، بولجام بويىنشا ماريحۋانا، سونداي-اق كەپتىرىلگەن، بولجام بويىنشا قاراسورا وسىمدىكتەرى انىقتالىپ، تاركىلەندى.
تالعار اۋدانىنىڭ جالكامىس، بەساعاش جانە جاڭالىق ەلدى مەكەندەرىندە وسىمدىك تەكتەس ەسىرتكى زاتتارى، سونداي-اق ەسىرتكى زاتتارىن وسىرۋگە جانە پايدالانۋعا ارنالعان دەپ بولجاناتىن قۇرال-جابدىقتار مەن زاتتار انىقتالىپ، تاركىلەندى. كەيبىر تاركىلەنگەن زاتتار بويىنشا ولاردى ساقتاۋ زاڭدىلىعىنا قاتىستى تەكسەرۋ جۇرگىزىلۋدە. سونىمەن قاتار جامبىل اۋدانىنىڭ مىڭبايەۆ اۋىلىندا تۇرعىن ءۇيدى ءتىنتۋ بارىسىندا ەرەكشە ءيىسى بار وسىمدىك تەكتەس ۇنتاق ءتارىزدى زات تاركىلەندى.
اتالعان بارلىق فاكتىلەر بويىنشا قولدانىستاعى زاڭناما تالاپتارىنا سايكەس سوتقا دەيىنگى تەرگەپ-تەكسەرۋ جانە وزگە دە پروسەسسۋالدىق تەكسەرۋ شارالارى جۇرگىزىلۋدە. پوليسيا ەسىرتكى زاتتارىنىڭ زاڭسىز اينالىمىنا قارسى جۇيەلى جۇمىستى جالعاستىرىپ، ازاماتتاردى وسىنداي قىلمىستاردى انىقتاۋعا ىقپال ەتەتىن اقپاراتتى قۇقىق قورعاۋ ورگاندارىنا حابارلاۋعا شاقىرادى.