وقۋشىلار اراسىندا ىندەتتى ەڭ كوپ جۇقتىرعانداردىڭ ىشىندە تالدىقورعان قالاسى ءبىرىنشى ورىندا تۇر.
الماتى وبلىسىندا 301 وقۋشى كوروناۆيرۋس جۇقتىرىپ، ەمدەلىپ جاتىر. سالدارىنان 122 سىنىپ كارانتينگە جابىلدى، دەپ حابارلايدى Almaty-akshamy.kz قازاقپارات-قا سىلتەمە جاساپ.
ءقازىر ىندەتتى جۇقتىرعان 301 وقۋشىنىڭ بارلىق سىنىپتاستارى ياعني 1489 وقۋشى قاشىقتان وقىتۋعا جىبەرىلدى. وقۋشىلار اراسىندا ىندەتتى ەڭ كوپ جۇقتىرعانداردىڭ ىشىندە تالدىقورعان قالاسى ءبىرىنشى ورىندا تۇر. وبلىس ورتالىعىندا 80 وقۋشىدان COVID-19 انىقتالعان. ماسەلەن قالاداعى لومونوسوۆ اتىنداعى №5 مەكتەپتىڭ 35 وقۋشىسى كوروناۆيرۋس جۇقتىرسا، №25 مەكتەپتەن 11 وقۋشى، ال №28 IT ليسەي-مەكتەپتەن 7 وقۋشىدان كوروناۆيرۋس انىقتالعان. «50 ۇستازدان كوروناۆيرۋس انىقتالدى. ول كىسىلەر ەم قابىلداۋدا جانە دە مەكتەپكە دەيىنگى ءبىلىم مەكەمەلەرىندە 12 جاعداي تىركەلگەن»، - دەدى الماتى وبلىستىق ءبىلىم باسقارماسىنىڭ ءبولىم باسشىسى الىشەر سىرىم. ال اۋدانداردىڭ ىشىندە كوروناۆيرۋس جۇقتىرعان وقۋشىلاردىڭ كوبىسى ەڭبەكشىقازاق، ۇيعىر، تالعار اۋدانىندا تىركەلگەن. ماسەلەن ەڭبەكشىقازاق اۋدانىندا 32، ۇيعىر اۋدانىندا 26، تالعار اۋدانىندا 22 وقۋشى ىندەتتى جۇقتىرىپ، ءقازىر ۇيلەرىندە ەمدەلىپ جاتىر. جالپى الماتى وبلىسىندا ءقازىر كوروناۆيرۋس جاعدايىنا بايلانىستى 1790 بالا ۇيىندە ءبىلىم الىپ ءجۇر. ونىڭ ىشىندە ىندەت جۇقتىرعاندارمەن بايلانىستا بولعاندار دا بار.