كەشە چەح جەرىندە ءبىزدىڭ الماتى تاريحي مۋزەيىنىڭ كورمەسى اشىلدى. الماتى قالاسى اكىمدىگىنىڭ جانە قازاقستان رەسپۋبليكاسىنىڭ چەح رەسپۋبليكاسىنداعى ەلشىلىگى، پراگا قالاسىنىڭ مەرياسى مەن پراگا قالاسى مۋزەيىنىڭ قولداۋىمەن جۇزەگە اسقان حالىقارالىق كورمە «ۋاقىت كەرۋەنى» دەپ اتالادى.
كورمەنىڭ اشىلۋ سالتاناتىندا پراگا قالاسى مۋزەيىنىڭ باسشىسى يۆو ماسەك، قازاقستاننىڭ چەح رەسپۋبليكاسىنداعى ەلشىسى باقىت دۇيسەنبايەۆ، الماتى قالاسى ءماسليحاتى ءتوراعاسىنىڭ مىندەتىن اتقارۋشى ءاسيا اقانوۆا، الماتى قالاسى ءماسليحاتىنىڭ دەپۋتاتى سالتانات سەرىكوۆا جانە الماتى قالاسى مۋزەيلەر بىرلەستىگىنىڭ ديرەكتورى ءلاززات ساعىندىقوۆا ءسوز سويلەدى.
سونىمەن قاتار، مادەني ءىس-شاراعا جاپونيا، كورەيا، كاتار، رەسەي، تۇركيا، مالايزيا كورولدىگى جانە باسقا 20-دان استام مەملەكەتتىڭ ەلشىلەرى قاتىستى.
بىلتىر ەكى مۋزەي اراسىندا ىنتىماقتاستىق جونىندەگى مەموراندۋمعا قول قويىلعان بولاتىن. بۇل كورمە سونىڭ جەمىسى، ىنتىماقتاستىقتىڭ ناقتى كورىنىسى. ىنتىماق دەمەكشى، قازاقستان رەسپۋبليكاسى مەن چەح رەسپۋبليكاسى اراسىنداعى ديپلوماتيالىق قاتىناستار 1993 جىلى 1 قاڭتاردا قۇرىلدى. جىل وتكەن سايىن ەكى ەل اراسىنداعى مادەني بايلانىس وسىلايشا نىعايىپ كەلەدى.
كورمەنىڭ ماقساتى – قازاقستان رەسپۋبليكاسى مەن چەح رەسپۋبليكاسى اراسىنداعى مادەني بايلانىستاردى ودان ءارى نىعايتۋ، سونداي-اق ۇلى دالا حالقىنىڭ تاريحى جانە مادەنيەتىمەن، جالپى كوشپەندىلەر مادەنيەتىمەن، اتاپ ايتقاندا كوشپەلى قازاقتاردىڭ داستۇرلەرىمەن، تۇرمىسىمەن، فيلوسوفياسىمەن جانە دۇنيەتانىمىمەن تانىستىرۋ.
الماتى قالاسى تاريحى مۋزەيىنىڭ «ۋاقىت كەرۋەنى» كورمەسى كەلۋشىلەردى ۇلى دالانى مەكەندەگەن حالىقتىڭ تەرەڭ تاريحى مەن مادەنيەتىمەن تانىستىرىپ، ەكى ەل اراسىنداعى مادەني ديالوگتى جالعاستىرادى دەسەك قاتەلەسپەيمىز.
پراگا تورىنە الماتى قالاسى مۋزەيلەر بىرلەستىگى قورىنان 220-دان استام ەكسپونات قويىلدى. كورمە قازاق حالقىنىڭ تۇرمىسىن، ءسالت-داستۇرىن، قولدانبالى ونەرىن باياندايتىن ەتنوگرافيالىق جادىگەرلەر، مۋزىكالىق اسپاپتار مەن الماتى قالاسىنىڭ تاريحى مەن قازىرگى ءومىرىن كورسەتەتىن فوتوسۋرەتتەرگە نەگىزدەلگەن. وسى ورايدا ايتا كەتەيىك، ءبىزدىڭ جادىگەرلەر قويىلعان پراگا مۋزەيى ورنالاسقان عيمارات ءحىىى-حىV عاسىرلاردا بوي كوتەرگەن، يۋنەسكو-نىڭ «الەمدىك مۇرا» تىزىمىنە ەنگەن.
– بۇگىندە الماتى قالاسى مۋزەيلەر بىرلەستىگى ەلىمىزدىڭ قوعامدىق جانە مادەني ومىرىنە بەلسەندى قاتىسىپ كەلەدى. ونىڭ ۇلەسىندە 2022-2024 جىلدارى ەرەكشە دامىعان حالىقارالىق ىنتىماقتاستىقتىڭ كەڭ باعدارلاماسى بار. ماسەلەن، بۇعان دەيىن سەۋل (كورەيا رەسپۋبليكاسى)، ستامبۋل (تۇركيا)، نەاپول (يتاليا) جانە ۆەنا (اۆستريا) قالالارىندا ۇلكەن جەتىستىكپەن وتكىزىلگەن حالىقارالىق كورمەلەردى اتاۋعا بولادى. ال پراگاداعى «ۋاقىت كەرۋەنى» وسى حالىقارالىق كورمەلەردىڭ زاڭدى جالعاسى، – دەيدى الماتى قالاسى مۋزەيلەر بىرلەستىگىنىڭ ديرەكتورى ءلاززات ساعىندىقوۆا.
ايتۋلى مادەني ءىس-شارا بارىسىندا الماتى قالاسى مۋزەيلەر بىرلەستىگى تۇركى الەمىنىڭ «ەڭ ۇزدىك مۋزەيى» اتاندى. سەرتيفيكاتتى تۇركسوي حالىقارالىق ۇيىمىنىڭ باس حاتشىسى سۇلتان رايەۆ تابىستادى.
ەۋروپالىقتاردىڭ نازارىنا ۇسىنىلعان كورمە تامىزدىڭ سوڭىنا دەيىن جالعاسادى.