الماتى مۋزەيىندە «تۇمسا تاريح تەرەڭىنەن...» اتتى كورمە جۇمىسىن باستايدى

6 قىركۇيەك كۇنى قالا كۇنى قارساڭىندا الماتى مۋزەيىندە «تۇمسا تاريح تەرەڭىنەن...» اتتى كورمەنىڭ اشىلۋى وتەدى.

مىڭ جىلدىق تاريحى بار، مادەني-تاريحي مۇرالارى مەن سۇلۋ تابيعاتى بار اسەم قالا، قازىرگى الماتى – قازاقستاننىڭ باتىل ءارى قارقىندى دامۋىنىڭ كورىنىسى، دەپ حابارلايدى  Almaty-akshamy.kz. 

قازىرگى الماتى تەرريتورياسى ب.ز.د. 12-9 عاسىرلاردان قولا ءداۋىرى كەزەڭىنەن يگەرىلە باستادى. ساقتار مەن ۇيسىندەر داۋىرىندە ب.ز.د. 6-2 عع. قازىرگى الماتى تەرريتورياسىنان عالىمدار كوپتەگەن ەرتەدەگى مەملەكەتتىك بىرلەستىكتەردىڭ – ساقتار مەن ءۇيسىن تايپالىق وداقتارىنىڭ تۇراقتارى مەن قورعاندارىن تاپتى. ال ورتا عاسىرلاردا 10-14 عع. وسى اۋماقتا الماتى دەپ اتالعان ۇلى جىبەك جولى بويىنداعى باي دامىعان وركەنيەتتى قالا بولدى. وعان دالەل ارحەولوگتار بۇرىنعى شەكاراشىلار ۋچيليششەسى (قازىرگى اسكەري ينستيتۋت) ورنالاسقان كونە قالاشىقتىڭ اۋماعىنان تاپقان كۇمىس ديرحەمدەر كورمەدە كورەرمەن نازارىنا ۇسىنىلاتىن بولادى.

سونداي-اق، كورمەدە الماتى مۋزەيىنىڭ قورىندا ساقتالعان قالامىزدىڭ تەرريتورياسىنان تابىلعان ءۇش مىڭ جىل بۇرىن پايدا بولعان شاعىن قونىستاردان، ۇلى جىبەك جولى بويىنداعى ورتاعاسىرلىق قالانىڭ اكىمشىلىك بيلىك، قولونەر، ساۋدا، مادەنيەت جانە يدەولوگيا ورتالىعىنا اينالعان الماتىنىڭ ۋربانيزاسيا ۇدەرىسىن كورسەتەتىن ارتەفاكتىلەر جانە قۇندى جازبا دەرەكتەر قويىلادى.

كورمە 12 قىركۇيەككە دەيىن جالعاسادى. وتەتىن ورنى مەن ۋاقىتى: الماتى ق.، قابانباي باتىر ك.، 132