قازاقستاندا العاش رەت سەۋل تاريحى مۋزەيىنىڭ كوللەكسياسىنان 100-دەن استام بىرەگەي ەكسپونات قويىلدى. بۇل ەكسپوناتتاردىڭ بارلىعى الماتى مۋزەيىنە كەلۋشىلەردىڭ نازارىنا «سەۋل عاجايىپتارى» كورمەسىندە ۇسىنىلدى، دەپ حابارلايدى اlmaty-akshamy.kz. 
ەكسپوناتتار كورەيا رەسپۋبليكاسىنىڭ تاريحىن، مادەنيەتى مەن ءداستۇرىن بەينەلەيدى. ودان بولەك، كورمەگە كەلۋشىلەر XIV عاسىردان XIX عاسىرعا دەيىن كورەيا ەلىن باسقارعان چوسون اۋلەتىنىڭ كيىمدەرى مەن اكسەسسۋارلارىن، تۇرمىستىق زاتتارىن، تاريحي قۇجاتتارى مەن ۇيىندەگى ينتەرەرىن كورە الادى.
ەستەرىڭىزگە سالا كەتەيىك، ەكى اپتا بۇرىن قازاقستانعا كورەيا رەسپۋبليكاسىنىڭ پرەزيدەنتى يۋن سوك ەل مەملەكەتتىك ساپارمەن كەلگەن بولاتىن. «سەۋل عاجايىپتارى» كورمەسى ەكى ەل اراسىنداعى مادەني ىنتىماقتاستىقتى ودان ءارى دامىتۋ باعىتىندا ۇيىمداستىرىلعان العاشقى بىرلەسكەن مادەني جوبا بولىپ تابىلادى.
«ءبىزدىڭ قازاقستانعا ساپارىمىزدىڭ ماقساتى - كورەيا رەسپۋبليكاسىنىڭ مادەنيەتىن كورسەتۋ. كورەي حالقىنىڭ عاسىرلار بويعى تاريحىمەن تانىستىرۋ ءۇشىن بىرەگەي ەكسپوناتتار الىپ كەلدىك. بۇل ءىس-شارا اياسىندا قازاقستاندىقتاردىڭ سەۋلگە كەلۋگە دەگەن قىزىعۋشىلىعى ارتادى دەپ سەنەمىز. سەۋلگە كەلىپ، قالامىزدىڭ تاريحي-تۋريستىك ورىندارمەن تانىسۋعا شاقىرامىز»، - دەدى سەۋل تاريحى مۋزەيىنىڭ ديرەكتورى چوي ءبون گۋ.
ەستەرىڭىزگە سالا كەتەيىك، قازاقستان رەسپۋبليكاسى مەن كورەيا رەسپۋبليكاسى اراسىنداعى ديپلوماتيالىق قاتىناستاردىڭ ورناعانىنا 30 جىل تولۋىنا وراي 2022 جىلدىڭ جەلتوقسانىندا سەۋل تاريحى مۋزەيىندە، ياعني كورەيادا الماتى مۋزەيى كورمە ۇيىمداستىرعان بولاتىن.
كورەيا رەسپۋبليكاسىنىڭ الماتى قالاسىنداعى باس كونسۋلى پاك نەچون «سەۋل عاجايىپتارى» كورمەسىنىڭ اشىلۋى ەكى مەملەكەت اراسىنداعى جارقىن ءىس-شارالاردىڭ ءبىرى بولىپ تابىلاتىنىن اتاپ ءوتتى.
كورمە الماتىلىقتار مەن قالا قوناقتارى ءۇشىن 2024 جىلدىڭ 20 تامىزىنا دەيىن جالعاسادى. كورەيا مادەنيەتىمەن تانىسۋ ءۇشىن قابانباي باتىر كوشەسى، 132 مەكەنجايىندا ورنالاسقان الماتى مۋزەيىنە كەلىڭىزدەر.