بۇگىن تۋريزم كۇنىنە وراي، الماتىدا قالانىڭ ماڭىزدى مۇراجايلارىن ارالاۋ ماقساتىندا باسپا ءسوز تۋرى ۇيىمداستىرىلدى.
بۇل شارا الماتى قالاسىنىڭ وڭىرلىك كوممۋنيكاسيالار قىزمەتى، الماتى قالاسىنىڭ مادەنيەت باسقارماسى جانە Almaty Tourism Bureau بىرلەسە وتىرىپ وتكىزىلدى. «الماتى مۇراجايلارى: تاريحقا ساياحات» اتتى بۇل باستاما قالانىڭ مادەني مۇراسىن ناسيحاتتاۋعا جانە بىرەگەي ەكسپوناتتارمەن تانىستىرۋعا باعىتتالدى، دەپ حابارلايدى aqshamnews.kz.
پرەسس-تۋردىڭ العاشقى نۇكتەسى ىقىلاس اتىنداعى مۋزىكالىق اسپاپتار مۇراجايى بولدى. جۋرناليستەر سيرەك كەزدەسەتىن حالىقتىق مۋزىكالىق اسپاپتارمەن تانىستى، ولاردىڭ كەيبىرى بىرنەشە عاسىر بۇرىن جاسالعان. ولاردىڭ اراسىندا جەلبۋاز، ادىرنا، شەرتەر، دومبىرا، قوبىز، سىبىزعى سەكىلدى اسپاپتار بار. ەكسكۋرسيا بارىسىندا ءارتۇرلى اسپاپتاردىڭ تۇرلەرى: داۋىلپاز، ۇرمالى، شەرتپەلى، ۇرمەلى اسپاپتار تۋرالى قىزىقتى اقپارات بەرىلدى. ارحەولوگيالىق تابىستار مەن قازاقستاننىڭ كونە مۋزىكالىق داستۇرلەرىنە ەرەكشە نازار اۋدارىلدى.
مۋزەيدىڭ ماقتانىشى — ايگىلى قازاق مۋزىكانتتارى مەن كومپوزيتورلارىمەن بايلانىستى بىرەگەي ەكسپوناتتار. ولاردىڭ ىشىندە قۇرمانعازى ساعىرباي ۇلىنىڭ دومبىراسى جانە XVءى عاسىردا جاسالعان جاراس باقسىنىڭ ەڭ كونە قوبىزى بار.
ودان ارى پرەسس-تۋر قاتىسۋشىلارى د.ا. قونايەۆ اتىنداعى مۇراجايدا بولدى، وندا جۋرناليستەر مەملەكەت قايراتكەرىنىڭ جەكە زاتتارىمەن، قولجازبالارىمەن جانە ارحيۆىمەن تانىستى. قونايەۆتىڭ العان ماراپاتتارى مەن وردەندەرى دە ۇلكەن قىزىعۋشىلىق تۋدىردى. ونىڭ 230 شارشى مەترلىك ءتورت بولمەلى پاتەرىندە بارلىعى بۇرىنعىداي ساقتالعان. سونداي-اق مۇراجايدا الەمدىك كوشباسشىلاردىڭ سىيلىقتارى، 500-دەن استام سيرەك كەزدەسەتىن وتتىق جيناعى جانە كوپتەگەن تىلدەردەگى كىتاپتار ۇسىنىلعان.
ءۇشىنشى نىسان عابيت مۇسىرەپوۆ اتىنداعى ادەبي-مەموريالدىق مۇراجاي بولدى. مۇراجايدا جازۋشىنىڭ ءومىرى مەن شىعارماشىلىعى تۋرالى قىزىقتى ماتەريالدار ۇسىنىلىپ، قوناقتار «قوزى كورپەش - بايان سۇلۋ» جانە «اقان سەرى - اقتوتى» سياقتى سپەكتاكلدەردىڭ ۇزىندىلەرىن كينوزالدا تاماشالادى.
تۋردىڭ سوڭعى نۇكتەسى الماتى قالاسىنىڭ تاريح مۇراجايى بولدى. بۇل جەردە قالانىڭ قالىپتاسۋى مەن دامۋىنا ارنالعان ەكسپوناتتار كورسەتىلدى. ارحەولوگيالىق تابىستار، تۇرمىستىق زاتتار، ەسكى كارتالار مەن قۇجاتتار، سونداي-اق قالانىڭ تاريحىن بەينەلەيتىن كورمەلەر ۇسىنىلدى.
پرەسس-تۋردىڭ قورىتىندىسىندا Almaty Tourism Bureau ديرەكتورى كاميللا لۇقپانوۆا جانە الماتى قالاسى مۇراجايلار بىرلەستىگىنىڭ باسشىسى ءلاززات ساعىندىقوۆا ءسوز سويلەدى. كاميللا لۇقپانوۆا الماتىنىڭ تۋريزم سالاسىندا سوڭعى جەتىستىكتەرىمەن ءبولىسىپ، قالانىڭ تۋريستىك الەۋەتىن ارتتىرۋعا باعىتتالعان جۇمىستاردى اتاپ ءوتتى. ول الماتىنىڭ ىشكى جانە حالىقارالىق نارىقتا تۋريستىك باعىت رەتىندە بەلسەندى دامىپ كەلە جاتقانىن جانە مۇراجايلاردىڭ بۇل ۇدەرىستە ماڭىزدى ءرول اتقاراتىنىن ايتتى.
«الماتى ءوزىن ىشكى نارىقتا عانا ەمەس، حالىقارالىق نارىقتا دا تۋريستىك باعىت رەتىندە بەلسەندى تۇردە تانىتۋدا. ىسكەرلىك ءتۋريزمدى تارتۋعا جانە حالىقارالىق ءىس-شارالاردى ۇيىمداستىرۋعا ەرەكشە نازار اۋدارىلادى. قالا مۇراجايلارى بىرەگەي مادەني جانە تاريحي ەكسپوزيسيالاردى ۇسىنا وتىرىپ، تۋريستىك ءونىمدى قالىپتاستىرۋدا شەشۋشى ءرول اتقارادى»، - دەپ ءتۇسىندىردى ك.لۇقپانوۆا.
الماتى قالاسى مۇراجايلار بىرلەستىگىنىڭ باسشىسى ءلاززات ساعىندىقوۆا مۇراجايلاردىڭ ۇلتتىق سانانى قالىپتاستىرۋ مەن ءتۋريزمدى دامىتۋداعى ماڭىزىن اتاپ ءوتتى. سونىمەن قاتار، ول الماتى اكىمى ەربولات دوسايەۆتىڭ شەشىمىمەن 2024 جىلى الماتى مۇراجايلارىنىڭ مەكتەپ وقۋشىلارى ءۇشىن تەگىن بولاتىنىن حابارلادى. بۇل جاڭالىق ب ا ق بەتىندە كەڭىنەن ايتىلىپ، حابارلاندى. سونىڭ ناتيجەسىندە جىل باسىنان بەرى مۇراجايلاردى 61 165 وقۋشى تاماشالاعان، بۇل 2023 جىلمەن سالىستىرعاندا 150%-عا كوپ.
مۇراجايلار بىرلەستىگى حالىقارالىق دەڭگەيدە بەلسەندى جۇمىس ىستەپ كەلەدى. ونىڭ كورمەلەرى سەۋل، ستامبۋل، نەاپول، ۆەنا جانە پراگا قالالارىندا ۇلكەن تابىسپەن وتكەن. مۇراجاي قىزمەتكەرلەرى پاريجدەگى ۇلتتىق ەسكەرتكىشتەر ورتالىعىندا بىلىكتىلىكتەرىن ارتتىردى. 2024 جىلى الماتى مۇراجايلارى تۇركسوي مۋزەيلەر قاۋىمداستىعىنا مۇشە بولىپ، «تۇركى الەمىنىڭ ۇزدىك مۇراجايى» («Best Museum of the Turkic world») اتاعىنا يە بولدى.
2024 جىلى مۇراجاي ءيميدجىن ىلگەرىلەتۋ ماقساتىندا برەندبۋك جاسالدى، وعان بىرلەستىكتىڭ جاڭارتىلعان لوگوتيپى، ونلاين بيلەتتەردى ساتىپ الۋعا بولاتىن رەسمي سايت ەنگىزىلدى. تامىز ايىنان باستاپ قالانىڭ 11 مەترو ستانسياسى مەن 29 لەد-ەكراندارىندا جارنامالىق ناۋقان جۇرگىزىلۋدە.
پرەسس-تۋر باعدارلاماسىنىڭ مازمۇنى باي ءارى جوعارى دەڭگەيدە ۇيىمداستىرىلعانى جۋرناليستەر تاراپىنان ەرەكشە باعالاندى.