اليمەنت تولەۋدەن جالتارعان تۇلعالارعا قاتىستى ىزدەۋ جاريالايدى
بالانى اسىراۋ – اتا-انانىڭ زاڭمەن بەكىتىلگەن مىندەتى. بۇل مىندەتتىڭ ورىندالۋى اتا-انانىڭ نەكەدە بولۋى، ازاماتتىق نەكەدە نەمەسە اجىراسقان بولۋىنا قاراماستان وزگەرمەيدى. قازىرگى تاڭدا ەلىمىزدە جاۋاپكەرشىلىكتى سەزىنبەيتىن اتا-انالاردىڭ بالاسىنا اليمەنت تولەمەي جۇرگەنى وزەكتى ماسەلەلەردىڭ ءبىرى بولىپ وتىر. اليمەنتتەر اي سايىن اتا-اناسىنىڭ ەڭبەكاقىسىنان نەمەسە وزگە تابىسىنان زاڭمەن بەلگىلەنگەن مولشەردە تولەنۋى ءتيىس.
جۇمىس ىستەمەيتىن بورىشكەردىڭ تولەۋگە مىندەتتى اليمەنت مولشەرى قازاقستان رەسپۋبليكاسىنىڭ ورتاشا جالاقىسىنا سايكەس ەسەپتەلەدى. قۇزىرلى ورگاندار تاراپىنان ءتۇرلى شارالار قابىلدانىپ جاتسا دا، بالاسىنىڭ جاعدايىنا ءمان بەرمەيتىن، اليمەنت تولەۋدەن جالتارىپ جۇرگەن اكەلەردىڭ سانى ازايماي وتىر.
اليمەنت تولەۋدەن جالتارىپ جۇرگەن بورىشكەرلەرگە قاتىستى جۇمىستار ۇزدىكسىز جۇرگىزىلۋدە. بۇل جۇمىستار بورىشكەرلەردى جۇمىسقا ورنالاستىرۋ، بەرەشەگى كوپ بورىشكەرلەردى اكىمشىلىك جاۋاپكەرشىلىككە تارتۋ، ولاردىڭ اتىنا تىركەلگەن مۇلىككە تىيىم سالۋ سەكىلدى شارالاردى قامتيدى.
سونىمەن قاتار، قازاقستان رەسپۋبليكاسىنىڭ اتقارۋشىلىق ءىس جۇرگىزۋ زاڭناماسىنا سايكەس اليمەنت تولەۋدەن جالتارىپ جۇرگەن بورىشكەرلەرگە ىزدەۋ جاريالاۋ – ماجبۇرلەۋ شارالارىنىڭ ءبىرى بولىپ تابىلادى. سوت ورىنداۋشىسى اليمەنت تولەۋدەن جالتارىپ جۇرگەن بورىشكەردى تابۋ ءۇشىن ىزدەۋ جاريالاۋ تۋرالى قاۋلى شىعارادى، بۇل قاۋلى پروكۋروردىڭ سانكسياسىنان ءوتىپ، كوشى-قون پوليسياسىنا جولدانادى.
كوشى-قون پوليسياسى اليمەنت تولەمەي جۇرگەن بورىشكەردى تابۋ ماقساتىندا قاجەتتى ىزدەۋ شارالارىن جۇرگىزەدى. بورىشكەر انىقتالعان جاعدايدا، كوشى-قون پوليسياسى ودان اتقارۋشىلىق ءىس بويىنشا مىندەتتەمەلەرىن ورىنداۋعا بايلانىستى تۇسىنىكتەمە الادى. سودان كەيىن سوت ورىنداۋشىسىنا بورىشكەردىڭ مەكەنجايى تۋرالى تولىق مالىمەت جولدانىپ، قارىزدى ءوندىرۋ جۇمىستارى جالعاسادى.
بورىشكەرلەر اليمەنت تولەۋ – زاڭدى مىندەت ەكەنىن جانە ونى ورىنداماعان جاعدايدا اكىمشىلىك جانە قىلمىستىق جاۋاپكەرشىلىككە تارتىلاتىنىن ۇمىتپاۋى قاجەت.